“Temurbeklar maktabi”da o‘zbek tili bayrami ko‘tarinki ruhda nishonlandi
2025-10-20 16:00:00 / Yangiliklar
Tadbirda o‘quvchilar tomonidan o‘zbek tilining boy ifoda-imkoniyatlarini, so‘z qudratini va badiiy go‘zalligini tarannum etuvchi she’rlar o‘qildi. Har bir satr, har bir sahna chiqishi orqali Temurbeklar o‘zbek tili — millat ruhi, xalqning yuragi ekanini ifoda etdilar. Ularning so‘zlarida faxr, ishonch va ona tiliga bo‘lgan cheksiz muhabbat aks etdi.
Ma’naviy-ma’rifiy tadbir davomida ona tilimizning davlat va jamiyat hayotidagi o‘rni, milliy o‘zlikni anglashdagi beqiyos ahamiyati haqida so‘z yuritildi. O‘zbek tili nafaqat aloqa vositasi, balki xalqni birlashtiruvchi, millatni tarbiyalovchi, yuraklarga g‘urur bag‘ishlovchi kuch ekani ta’kidlandi.
Tadbir yakunida o‘z chiqishlari bilan bayramga o‘zgacha ruh bag‘ishlagan o‘quvchilarga tashakkurnomalar topshirildi.
Sharqiy harbiy okrug matbuot xizmati