“Birlik – 2025” birgalikdagi mintaqaviy o‘quv doirasida harbiy-ilmiy tadbir o‘tkazildi
2025-10-16 15:55:00 / Yangiliklar
Ta‘kidlash joizki, mamlakatlarimiz o‘rtasida har yili an‘anaga aylanib borayotgan qo‘shma harbiy mashg‘ulotlar mintaqaviy xavfsizlik va harbiy hamkorlikni rivojlantirishda, o‘zaro tajriba almashishda muhim voqea bo‘lmoqda.
Markaziy harbiy okrugda o‘tkazilgan mazkur tadbir joriy yilning 8-aprel kuni Toshkent shahrida o‘tkazilgan xalqaro harbiy-ilmiy konferensiyaning mantiqiy davomi sifatida baholanib, unda har bir mamlakat vakillari o‘z ma‘ruzalari bilan ishtirok etdi.
“Markaziy Osiyo davlatlari va Ozarboyjon Respublikasi Qurolli Kuchlari Bosh shtablari oʻrtasidagi hamkorlikning hozirgi holati va rivojlanish istiqbollari” mavzusidagi davra suhbati davomida nutq so‘zlaganlar, mamlakatlarimizda barqarorlik va xavfsizlikni ta’minlaydigan qo‘shma strategiyalarni ishlab chiqish bo‘yicha sa’y-harakatlarni muvofiqlashtirish alohida ahamiyatga ega ekanligini ta‘kidlashdi.
Shuningdek, harbiy-ilmiy tadbirlarning hozirgi formatida mamlakatlarimizda tinchlik va barqarorlikni taʼminlash bilan bogʻliq umumiy masalalar ham muhokama etilib, mintaqada mudofaa va xavfsizlik sohasida hamkorlikdagi harbiy-ilmiy faoliyatni yangi bosqichga olib chiqish bo‘yicha takliflar va ekspert xulosalari tinglandi. Uchrashuv davomida mamlakatlarimiz Qurolli Kuchlari Bosh shtablari o‘rtasidagi hamkorlikning hozirgi holati va rivojlanish istiqbollari, mudofaa va xavfsizlik sohasida mintaqadagi davlatlarning ilmiy va ta’lim muassasalari bilan hamkorlik istiqbollari yuzasidan muhokamalar o‘tkazildi.
Tadbir yakunida Markaziy Osiyo hamda Ozarboyjon Respublikasi mudofaa sohasi vakillari ishtirokida hamkorlik memorandumi imzolandi.
Mudofaa vazirligi Axborot va ommaviy kommunikatsiyalar departamenti