“Mahorat – 2025”: O‘zbekiston va Ozarboyjon birgalikdagi kompyuter qo‘mondonlik-shtab o‘quvi boshlandi
2025-09-23 15:00:00 / Yangiliklar
O‘quv mashg‘ulotlari “Xalqaro terroristik va ekstremistik tashkilotlarning qurolli tuzilmalarini qurshovga olish, ajratib qo‘yish va yakson qilish bo‘yicha qo‘shinlarning maxsus harakatlarini tashkillashtirish va olib borish” mavzusida bo‘lib o‘tmoqda.
Sharqiy harbiy okrug qo‘shinlari qo‘mondonligi rahbarligida tashkillashtirilgan o‘quvining birinchi kuni Ozarboyjon harbiy delegatsiyasi dastlab markaz faoliyati bilan tanishdi. Shundan so‘ng ishtirokchilarga guruhlarning taktik vazifalari, dastlabki holat hamda jangovar harakatlarga oid zarur ma’lumotlar taqdim etildi. O‘quv mashg‘ulotining faol bosqichiga tayyorgarlik boshlandi.
O‘quv davomida ikki davlat harbiylari chegarani buzib o‘tishga urinishlar va noqonuniy qurolli tuzilmalarga qarshi kurash jarayonida o‘zaro tajriba va malaka almashadi. Shuningdek, qurolli to‘qnashuvlarda qo‘shinlarning jangovar harakatlari, maxsus guruhlar va bo‘linmalarning amaliyotlari nazariy hamda amaliy jihatdan muhokama qilinadi.
Mudofaa vazirligi Axborot va ommaviy kommunikatsiyalar departamenti