O‘zbekiston Respublikasi Mudofaa vazirligi

Bellashuvlar bir necha kun davom etib, harbiy xizmatchilar turli mashqlardan iborat uch bosqichli sinovlarda o'z mahoratini namoyish etdi. Xususan, birinchi bosqichda kuch mashqlarini uddalagan harbiy xizmatchilar, yagona to'siqlar yo'lagidan o'tib, umumiy nazorat mashqlarini bajarishdi. Eng mashaqqatli shart – belgilangan tartibda 30 kilometrga piyoda yurish (marsh yurish) bo'lib, undan muvaffaqiyatli o'tganlar, oxirgi bosqichda o'qotar qurollardan otish hamda pichoq uloqtirish amaliyotini bajarishdi.
Sinovlarni Mudofaa vazirligi Jangovar tayyorgarlik bosh boshqarmasi mas'ul ofitserlari va harbiy okruglardan biriktirilgan mutaxassislar xolisona baholab bordi. Saralash nizomiga ko‘ra, bir bosqichdan o‘tolmagan harbiy xizmatchi keyingi bosqichga qo‘yilmasligini inobatga olsak, jarayonlar o‘ta bahsli va murosasiz kechdi.
Bir necha kun davom etgan sinovlarda 400 nafardan ortiq da’vogar ishtirok etgan bo‘lsa, shulardan 300 nafarga yaqin ishtirokchilar shartlarni muvaffaqiyatli bajarib, “Dovyurak jangchi” degan mardonavor nomga sazovor bo‘ldi.

Ma’lumot uchun, ular harbiy unvon va lavozim maoshining bir baravari miqdoridagi biryo‘la to‘lanadigan pul mukofoti bilan ham taqdirlandi va “Dovyurak jangchi” farqlovchi nishoni butun xizmat faoliyati davomida saqlanib qoladi.
Mudofaa vazirligi Axborot va ommaviy kommunikatsiyalar departamenti