O‘zbekiston Respublikasi Mudofaa vazirligi

Tadbirlarda soʻzga chiqqan hokimlik vakillari, harbiy xizmatchilar va boshqa mehmonlar keyingi yillarda mamlakatimizda maktab taʼlimini rivojlantirish davlat siyosatining ustuvor yoʻnalishlaridan biriga aylanib, “Yangi Oʻzbekiston maktab ostonasidan boshlanadi” degan ezgu gʻoya asosida ulkan islohotlar amalga oshirilayotganini taʼkidlashdi.

Shundang soʻng taʼlim maskaniga ilk qadamini qoʻygan birinchi sinf oʻquvchilariga “Prezident sovgʻasi” topshirildi.

Tantanali tadbirlarning badiiy qismida harbiy xizmatchilar tomonidan tayyorlangan koʻrgazmali chiqishlar va harbiy orkestrning ona Vatanni ulugʻlovchi kuy-qoʻshiqlari bolajonlarning yangi oʻquv yilini vatanparvarlik hislari bilan boshlashiga undagan bo‘lsa ajabmas.

“Birinchi qoʻngʻiroq” tadbirlari doirasida Qurolli Kuchlar faxriylari va harbiy xizmatchilar tomonidan o‘tkazilgan “Mustaqillik darslari” alohida ahamiyat kasb etdi. Mazkur darslarda istiqlol yillarida erishilgan yutuqlar, yoshlarimiz tomonidan qoʻlga kiritilgan ulkan gʻalabalar hamda milliy tariximizning yorqin lavhalari haqida oʻquvchilar  bilan ochiq muloqotlar o‘tkazildi.

Shuni alohida ta’kidlash kerakki, maktablar negizida tashkil etilgan tayanch harbiy-vatanparvarlik yo‘nalishidagi “Jasorat maktabi”ga ilk o‘quvchilar ham qabul qilindi. Mehmonlar maxsus o‘quv sinflarida yosh Vatan himoyachilari bilan ham alohida uchrashuvlar o‘tkazdi.

Shuningdek, “Mustaqillik darslari”da jadidchilik harakati namoyandalaridan Mahmudxoʻja Behbudiy, Abdurauf Fitrat, Abdulla Avloniy, Munavvar Qori Abdurashidxonov va qatagʻon qurbonlarining hayot kechinmalari va ularning ilgari surgan harakatlari haqida so‘zlab berildi.

Ushbu tashabbuslar yoshlarda nafaqat bilimga bo‘lgan qiziqishni kuchaytiradi, balki ularni milliy g‘urur, istiqlolga sadoqat va Vatanga muhabbat ruhida tarbiyalashda ham katta ahamiyat kasb etadi, albatta.

Mudofaa vazirligi Axborot va ommaviy kommunikatsiyalar departamenti