O‘zbekiston Respublikasi Mudofaa vazirligi

Mazkur tanlov O‘zbekiston Respublikasi Prezidenti tomonidan ilgari surilgan “Yangi O‘zbekiston – ma’rifatli jamiyat” konsepsiyasi hamda yoshlar o‘rtasida kitobxonlikni keng targ‘ib qilish bo‘yicha belgilangan vazifalar ijrosini ta’minlash doirasida o‘tkazildi. Tadbirga harbiy qismlar va bo‘linmalarda xizmat qilayotgan ofitserlar, serjantlar, shuningdek, muddatli harbiy xizmatchilar jalb etildi.

Ko‘rik-tanlov uch bosqichda o‘tkazilib, dastlabki shartida ishtirokchilar tanlagan badiiy va ilmiy-ommabop asarlar yuzasidan o‘z fikrlarini bayon qildilar. Ikkinchi shartda esa ular asar qahramonlari xarakteri, asarda ilgari surilgan g‘oyalar, muallif uslubi va tarixiy-ma’naviy ahamiyatini chuqur tahlil qilish bo‘yicha baholandi. Yakuniy shartida ishtirokchilar tezkor savol-javob va erkin munozara jarayonida o‘z bilimlarini sinovdan o‘tkazishdi.

Tadbir davomida adabiyotning inson tafakkurini boyitishdagi o‘rni, harbiy xizmatchilar ma’naviy-ruhiy tayyorgarligini mustahkamlashdagi ahamiyati haqida ma’ruzalar tinglandi. Shuningdek, tashkilotchilar tomonidan zamonaviy adabiyot, tarixiy asarlar va harbiy mavzudagi kitoblar ko‘rgazmasi ham namoyish etildi.

Natijalar bo‘yicha eng yuqori ball to‘plagan Nukus garnizoni harbiy xizmatchisi “Eng yaxshi kitobxon” tanlovininng Mutlaq g'olibiga aylandi va tanlovning vazirlik bosqichiga yo'llanmani qo'lga kiritdi. G‘oliblar safida nafaqat ko‘p kitob o‘qigan, balki mutolaadan to‘g‘ri xulosa chiqarib, uni hayot va xizmat faoliyatida qo‘llay oladigan bilimdon harbiy xizmatchilar faxriy yorliq va esdalik sovg‘alari bilan taqdirlandi.

Mazkur ko‘rik-tanlov nafaqat kitobxonlik madaniyatini yuksaltirish, balki shaxsiy tarkib orasida sog‘lom ma’naviy muhitni mustahkamlashga, o‘zaro fikr almashish, do‘stona muloqot va ijodiy izlanishga keng imkoniyat yaratdi.

Shimoli-g‘arbiy harbiy okrug matbuot xizmati