O‘zbekiston Respublikasi Mudofaa vazirligi

Mazkur tadbir Toshkent harbiy okrugi qo‘mondonligi va Angren shahar hokimligi hamkorligida o‘tkazilib, yoshlarda Vatanga muhabbat, milliy g‘urur, fidoyilik va harbiylik kasbiga bo‘lgan hurmat tuyg‘ularini yuksaltirishga qaratildi.

Tadbir doirasida yosh avlod vakillariga O‘zbekiston Qurolli Kuchlarida olib borilayotgan keng qamrovli islohotlar, mudofaa sohasidagi ilg‘or yondashuvlar hamda harbiy xizmatchilar uchun yaratilgan qulay shart-sharoitlar haqida batafsil ma’lumotlar taqdim etildi. Harbiy xizmatchilar tomonidan taqdim etilgan chiqishlar, so‘zga chiqqan faxriylar va harbiy rahbarlarning nutqlari yoshlarda armiyaga bo‘lgan qiziqishni yanada oshirdi.

Tadbirning badiiy qismida harbiy orkestr tomonidan ijro etilgan Vatanni ulug‘lovchi kuy-qo‘shiqlar, faxriy qorovul jamoasining ko‘rgazmali chiqishlari, sahna ko‘rinishlarida ifodalangan vatanparvarlik g‘oyalari tomoshabinlarda chuqur taassurot qoldirdi. Yoshlar, o‘qituvchilar, mahalla faollari va keng jamoatchilik vakillari ushbu ma’rifiy dasturdan ilhom olib, harbiy xizmatga bo‘lgan ijobiy munosabatlarini bildirib o‘tishdi.

Darhaqiqat, bugungi kunda mamlakatimizda yoshlarga bo‘lgan e’tibor davlat siyosatining ustuvor yo‘nalishlaridan biri sanaladi. Jumladan, ularni sog‘lom, intellektual va vatanparvar ruhda kamol toptirish, milliy armiyamiz saflariga munosib kadrlar sifatida tayyorlash yo‘lida tizimli ishlar olib borilmoqda. Mazkur tadbir ham ushbu ezgu maqsadlarga xizmat qilgani bilan alohida ahamiyatga ega bo‘ldi.

Tadbir yakunida mahalla yoshlari, oila vakillari hamda faxriylar bunday ruhiy-ma’naviy uchrashuvlarning ahamiyatini yuqori baholab, ularni doimiy asosda tashkil etish bo‘yicha takliflar bildirishdi.

Toshkent harbiy okrugi matbuot xizmati