O‘zbekiston Respublikasi Mudofaa vazirligi

Mazkur tashabbus doirasida “Tong” bolalar oromgohida tashkil etilgan “Chaqmoq trening” harbiy-sport musobaqasi ham bolalar hayotida unutilmas taassurotlar, mustahkam saboqlar va yangi mahoratlar qoldirdi.

Musobaqa davomida ishtirokchilar bir qator murakkab, ammo qiziqarli sinovlarda o‘z kuch va salohiyatlarini namoyon etdilar. “Chang‘ida harakatlanish” mashqi ularning bardoshliligi va tezkorligini, “To‘siqlar yo‘lagidan o‘tish” esa epchillik va chaqqonlik darajasini sinovdan o‘tkazdi. Jamoaviy muvofiqlikni talab qiluvchi “Snaryadni xavfsiz joyga olib borish” mashqi esa bolalarda bir maqsad sari birlashtirib, o‘zaro yelkadoshlik va ishonchni mustahkamladi.

Bundan tashqari, “Botqoqlikdan o‘tish” topshirig‘i qat’iyat va ruhiy barqarorlikni talab qilgan bo‘lsa, “Merganlik mashqi” bolalarning diqqat, aniqlik va psixologik barqarorlik darajasini aniqlashga qaratildi. Har bir sinov bolalarning hayotiy ko‘nikmalarini kengaytirib, ularda mustaqil qaror qabul qilish, muammolarga yechim topish kabi muhim fazilatlarni shakllantirdi.

Bellashuvlar davomida bolalar faqatgina jismoniy jihatdan emas, balki ruhiy tayyorgarlikda, tezkor fikrlashda, stressga bardoshlilikda va liderlik fazilatlarida ham o‘zlarini sinab ko‘rdilar.

Musobaqa yakunida eng yaxshi natijalarni qayd etgan jamoalar alohida taqdirlandi. Ularga vazirlik ma’sullari tomonidan ko‘krak nishonlari hamda esdalik sovg‘alari tantanali tarzda topshirildi. Bu esa bolalar uchun nafaqat yutuq, balki yana-da katta maqsadlar sari intilish uchun ruhlantiruvchi manbai bo‘ldi.

Mudofaa vazirligi Axborot va ommaviy kommunikatsiyalar departamenti