“Jangovar vaziyatlarda psixologik ta’minotni tashkillashtirish” mavzusida o‘quv-uslubiy yig‘in o‘tkazildi
2025-07-03 07:55:00 / Yangiliklar
Uch bosqichda o‘tkazilgan yig‘inning dastlabki kunlarida Mudofaa vazirligi ma’sul ofitserlari tomonidan harbiy psixologlarning o‘tkazgan nazariy mashg‘ulotlari, psixologik ta’minotning mavjud holatini tahlili, kamchiliklarni aniqlash va zamonaviy jangovar sharoitlarga mos keladigan yechimlar ishlab chiqish jarayonida olib borayotgan sayi-harakatlari tahlil etildi. Bu jarayonda harbiy psixologlar jangovar holatlarda stressni boshqarish, ruhiy barqarorlikni saqlash va psixologik yordamni samarali ko‘rsatish usullarini qayta ko‘rib chiqdi. Bu amaliyotlar, harbiy psixologiyaning nafaqat jangovar holatlarda, balki harbiy xizmatchilarning kundalik tayyorgarlik jarayonlarida ham muhimligini ta'kidlandi.
Yig‘inning ikkinchi va uchinchi kunlari, "Termiz" dala poligonida tashkil etilgan, jangovar sharoitlarga moslashtirilgan yer osti axloqiy-ruhiy ta’minot shaharchasida amalga oshirildi. Ushbu shaharcha, harbiy psixologlarga jangovar sharoitlarda ruhiy barqarorlikni mustahkamlash bo‘yicha amaliy mashg‘ulotlar o‘tkazishga imkon berdi. Shaharchadagi maxsus jihozlar va jangovar vaziyatlarga yaqinlashtirilgan sharoitlar harbiy xizmatchilar uchun ruhiy stressni yengish, jismoniy va ruhiy izchillikni saqlashga yordam beruvchi samarali muhitni yaratdi.
Darhaqiqat, zamonaviy harbiy sharoitlarda psixologik ta’minotning roli yanada muhimlashmoqda. Jangovar holatlarda psixologik yordamning samarali taqdim etilishi, nafaqat jangovar vaziyatlarda, balki xavfli vaziyatlarga tayyorlanish, stressni boshqarish va jangovar ruhiy holatni yaxshilashda harbiy xizmatchilarning samaradorligini oshirishda o‘zining ta’sirini ko‘rsatadi. Psixologik yordamning to‘g‘ri yo‘naltirilishi harbiy xizmatchilarning psixologik barkamolligini saqlashga yordam beradi va ularning jangovar holatda o‘z salohiyatini to‘liq namoyish etishiga imkon yaratadi.
Janubi-g‘arbiy maxsus harbiy okrug matbuot xizmati