O‘zbekiston Respublikasi Mudofaa vazirligi

Mudofaa vazirligi huzuridagi O‘q otish sport markazida 21 yoshgacha bo‘lgan yoshlar o‘rtasida o‘tkazilgan O‘zbekiston chempionati bu boradagi ezgu tashabbuslarning amaliy ifodasi bo‘ldi. Bellashuvlar 10 va 50 metr masofadan miltiq, shuningdek, 10 va 25 metr masofadan pistolet yo‘nalishlarida tashkil etilib, unda yurtimizning barcha hududlaridan kelgan iqtidorli yosh merganlar o‘z kuch va mahoratlarini sinovdan o‘tkazdi.

Musobaqaning ochilish marosimida Mudofaa vazirining yoshlarga yo‘llagan samimiy tabrigi o‘qib eshittirildi. Unda davlatimiz tomonidan sportchilar uchun yaratilayotgan zamonaviy infratuzilmalar, xalqaro maydonlarda erishilayotgan yutuqlar va sport orqali yoshlar qalbida vatanparvarlik, fidoyilik, matonat kabi ezgu fazilatlarni shakllantirish muhimligi ta’kidlandi.

Tadbir doirasida so‘zga chiqqan mutasaddilar va murabbiylar tomonidan O‘zbekistonda o‘q otish sportiga qaratilayotgan e’tibor, mazkur yo‘nalishdagi ilg‘or tajribalarning joriy etilishi, shuningdek, yosh sportchilarning tayyorgarlik jarayonlari va xalqaro arenalarga chiqish istiqbollari haqida batafsil ma’lumotlar berildi.

Musobaqa jarayonida g‘oliblik uchun kechgan kurash sportchilar o‘rtasida sog‘lom raqobat muhitini yaratdi. Har bir ishtirokchi o‘zining eng yaxshi jihatlarini namoyish qilishga intildi. 

Musobaqa davomida 10 metrlik masofadan miltiqda otish yo‘nalishida 1-o‘rinni qo‘lga kiritgan Javohir Sohibov o‘z taassurotlarini bildirib, o‘q otish sportiga uzoq yillardan beri qiziqishini, bu yo‘nalishda muntazam shug‘ullanib kelayotganini ta’kidladi. Uning fikricha, ushbu sport turi insonda diqqatni jamlash, aniq va tezkor qaror qabul qilish, shuningdek, mas’uliyat hissini shakllantirishda muhim rol o‘ynaydi. Sohibov, shuningdek, kelgusida xalqaro musobaqalarda O‘zbekiston sharafini munosib himoya qilishni o‘z oldiga maqsad qilib qo‘yganini aytib o‘tdi.

Chempionatda g‘olib va sovrindor bo‘lgan yoshlar maxsus diplomlar, medallar hamda esdalik sovg‘alari bilan taqdirlandilar. 

Mazkur musobaqa o‘z mohiyatiga ko‘ra, sportni faqat jismoniy faollik emas, balki ma’naviy barkamollik vositasi sifatida targ‘ib etayotgan yurtimiz siyosatining amaliy namunasi bo‘ldi. Unda qatnashgan har bir yosh sportchi o‘zida fidoyilik, g‘urur, iroda va Vatanga sadoqat kabi yuksak qadriyatlarni yanada mustahkamladi.

Mudofaa vazirligi Axborot va ommaviy kommunikatsiyalar departamenti