“G‘oyaviy jangchi” ko‘rik-tanlovining Sharqiy harbiy okrug bosqichi bo‘lib o‘tdi
2025-06-28 15:55:00 / Yangiliklar
Farg‘ona garnizonida “Men g‘olib” shiori ostida o‘tkazilgan tanlov zamonaviy armiyamiz safidagi harbiy xizmatchilarning nafaqat jismoniy, balki intellektual va ma’naviy yetukligini namoyon etishga qaratilgan muhim loyihalardan biri sifatida e’tirof etildi.
Unda Sharqiy harbiy okrugga qarashli harbiy qismlar va muassasalarda xizmat qilayotgan kontrakt asosidagi va muddatli harbiy xizmatchilar orasidan saralab olingan eng faol, izlanuvchan va bilimli ishtirokchilar qatnashdi.
Ko‘rik-tanlov uch asosiy shart asosida tashkil etilib, unda har bir shart doirasida ishtirokchilar o‘z fikrini mustaqil ifoda etish, dolzarb mavzularni yoritish, sahna madaniyatini ko‘rsatish va g‘oyaviy mazmun kasb etgan chiqishlar bilan hay’at a’zolari va tomoshabinlarda iliq taassurot uyg‘otdi. Ayniqsa, Vatanparvarlik, jasorat, milliy qadriyatlarga sadoqat, ajdodlar merosiga hurmat va Vatanga fidoyilik g‘oyalari har bir ishtirokchining chiqishida ustuvor bo‘ldi.
Ko‘rik-tanlov davomida harbiy xizmatchilarning mas’uliyat, jamoaviylik, tashabbuskorlik va ma’naviy barqarorlik borasidagi fazilatlari namoyon bo‘ldi. Bu esa harbiy jamoalarda sog‘lom muhit va yetakchilik madaniyatini shakllantirishda tanlovning naqadar amaliy ahamiyatga ega ekanini yana bir bor tasdiqladi.
Do‘stona va sog‘lom raqobat ruhida o‘tgan tanlov yakunida g‘olib va sovrindorlar tashkilotchilar tomonidan munosib taqdirlandi. Ular esdalik sovg‘alari va tashakkurnomalar bilan mukofotlanib, navbatdagi — Mudofaa vazirligi miqyosidagi bosqichda Sharqiy harbiy okrug sharafini munosib himoya qilish yo‘llanmasini qo‘lga kiritdilar.
Sharqiy harbiy okrug matbuot xizmati