O‘zbekiston Respublikasi Mudofaa vazirligi

Tadbirlar Qurolli Kuchlar akademiyasi, Harbiy tibbiyot akademiyasida hamda Aloqa harbiy instituti bo‘lib o‘tdi.

Bu kun har doim bilim yurtlari tarixida o‘zgacha shukuhda qarshi olinadi. Harbiy orkestrning “Qarshilov marshi” sadolari ostida bayroqdorlar sahnada qad rostladi. Soʻngra marosimga tashrif buyurgan Mudofaa vazirligi rahbariyati, Sog‘liqni saqlash vazirligi mas’ullari, faxriylar, professor-oʻqituvchilar, bitiruvchilarning oila aʼzolari, yaqinlari ishtirokida bayramona tadbir ochiq deb eʼlon qilindi.

Marosimda mudofaa vazirining tegishli buyrugʻi oʻqib eshittirilgach, barchaning koʻz oʻngida bitiruvchilarga magistrlik diplomi va koʻkrak nishonlari olqishlar bilan topshirildi.

Taʼkidlash joizki, bitiruvchilar bilan tasdiqlangan taʼlim dasturlariga muvofiq nazariy va amaliy mashgʻulotlar olib borilib, ularga bilim yurtining eng tajribali professor-oʻqituvchilari dars berishdi. Ana shu ilm va tajribalarni puxta oʻzlashtirgan bitiruvchilar esa kelgusi faoliyatlarida qoʻshinlarimiz shaxsiy tarkibida faol qoʻllaydilar.

Soʻz olganlar bugungi dunyoning notinch manzaralari har qanday harbiy xizmatchidan avvalo zamonaviy bilimlar, chuqur mulohaza va tezkorlik talab qilishini, bugungi boshqaruv strategiyasi har lahzada yangidan yangi gʻoyalar asosida shakllanishini aytib oʻtishdi.

Shuningdek, tadbir davomida mudofaa vazirligi rahbariyati, faxriy mehmonlar bitiruvchilarni samimiy tabriklar ekan, bundan keyin ham kasbiy bilimlarni yanada chuqurlashtirish, doimiy oʻqib-izlanish zaruratini aytib oʻtishdi.

Qurolli Kuchlar akademiyasida o‘tkazilgan tadbir doirasida bir guruh harbiy xizmatchilarga navbatdagi “podpolkovnik” harbiy unvoni topshirilgan bo‘lsa, Harbiy tibbiyot akademiyasida internatura tinglovchilariga diplom va navbatdagi harbiy unvonlar berildi.

Maʼlumot uchun, Yangi Oʻzbekiston xavfsizligini taʼminlashda, harbiy boshqaruv hamda operativ taktik boʻgʻindagi ofitserlarni tayyorlash maqsadida Qurolli Kuchlar akademiyasining “Harbiy xavfsizlik va davlat mudofaasi fakulteti” negizida “Davlat va harbiy boshqaruv” hamda “Qoʻshinlarning operativ taktik shtab qoʻmondonligi” mutaxassisligi boʻyicha yuqori malakali kadrlarni tayyorlash yoʻlga qoʻyilgan boʻlib, ayni vaqtga qadar ushbu dargohni kuch tuzilmalaridan oʻn ming nafardan ortiq ofitserlar tamomladilar.

Mudofaa vazirligi Axborot va ommaviy kommunikatsiyalar departamenti