O‘zbekiston Respublikasi Mudofaa vazirligi

Olmazor tumanidagi maktab bitiruvchi yoshlarga bag‘ishlangan ushbu bayramona tadbir Mudofaa vazirligi, Toshkent shahar hokimligi, Yoshlar ittifoqi Toshkent viloyat kengashi hamda Olmazor tuman hokimligi hamkorligida o‘tkazildi.

Konsert dasturi Mudofaa vazirligi ashula va raqs ansambli sozandalari milliy kuy-qo‘shiqlar, jozibador raqslar va jonli ijrolar bilan boshlandi. Tomoshabinlar, ayniqsa, yoshlar qalbida faxr va quvonch uyg‘otgan har bir sahna chiqishi katta hayajon bilan kutib olindi.

Tadbirning esda qolarli qismlaridan yana biri o‘zbek estradasining yorqin yulduzlarining sahnaga chiqishi bo‘ldi. Mashhur xonandalar tomonidan ijro etilgan sevimli qo‘shiqlar amfiteatrga to‘plangan minglab yoshlarga chinakam bayramona kayfiyat ulashdi. Har bir ohang, har bir so‘z yoshlik orzulariga hamnafas bo‘lib yangradi.

Tadbir yakunida ishtirokchilarga samimiy tilaklar izhor etildi. Ertamiz egalari uchun tashkil etilgan ushbu yoshlik bayrami uzoq vaqt yodda qoladigan yorqin xotiraga aylandi.

Mudofaa vazirligi Axborot va ommaviy kommunikatsiyalar departamenti