O‘zbekiston Respublikasi Mudofaa vazirligi

Loyihada ishtirok etgan maktab bitiruvchilari harbiy qism hududiga erta tongda yetib kelib, o‘zlarini haqiqiy harbiy xizmatchilar kabi his etishdi. Ularga harbiy libos topshirildi va harbiy hayot tarzining barcha jabhalari bilan bevosita tanishish imkoniga ega bo‘lishdi.
Ishtirokchilar harbiy yotoqxona, o‘quv xonalari, kutubxona, muzeylar bilan yaqindan tanishib, kundalik xizmat tartibi, intizom va saf amaliyotlarida ishtirok etdilar. Shuningdek, askarlar oshxonasida nonushta va tushlik qilish orqali harbiylarning turmush tarzini chuqurroq his qildilar.
Tadbir davomida tajribali harbiy xizmatchilar tomonidan yoshlar uchun maxsus ma’ruzalar o‘tkazildi. Unda Vatan himoyasi, fuqarolik burchi, jasorat, sadoqat va matonat kabi ezgu tushunchalar chuqur yoritildi. Harbiylar o‘z kasbiy yo‘llari, xizmatdagi voqealar va hayotiy saboqlari bilan o‘rtoqlashib, yosh avlodni Vatanga xizmat qilishga ruhlantirdilar.
Shuningdek, loyihada ishtirok etgan yoshlar ushbu tashabbus ularning hayotida o‘chmas iz qoldirganini ta’kidlashdi. Ular bu kabi amaliy loyihalar harbiy sohaga bo‘lgan qiziqishni oshiribgina qolmay, balki kasb tanlashda, hayotiy maqsad va qadriyatlarni belgilashda muhim rol o‘ynashini qayd etdilar.
“Harbiy qismda bir kun” loyihasi — bu oddiy tadbir emas, balki yosh avlod qalbiga Vatanga muhabbat, mas’uliyat, intizom va mardlik ruhini singdiruvchi amaliy saboq maktabidir.

Janubi-G‘arbiy maxsus harbiy okrug matbuot xizmati