O‘zbekiston Respublikasi Mudofaa vazirligi

Mazkur mashg‘ulotda ishtirokchilarga musobaqaning maqsadi va vazifalari keng tushuntirilib, institut kursantlari tomonidan har bir shartning bajarilish tartibi amaliy tarzda namoyish etildi.

Musobaqa Qarshi harbiy garnizoni, oromgohlar va mahallalarda, xususan, Shahrisabz tumanining so‘lim Miraki qishlog‘ida joylashgan “Lochin” bolalar sog‘lomlashtirish oromgohida ham muvaffaqiyatli o‘tkazildi. Mingga yaqin o‘quvchi-yoshlar ishtirokida o‘tkazilgan bellashuvlarda harbiy xizmatchilar jamoalarni guruhlarga bo‘lib, turli shartlar asosida musobaqalarni olib bordi.

Shartlar soddaligi va qiziqarliligi bilan ajralib turib, chang‘ida harakatlanish, to‘siqlar yo‘lagidan o‘tish, mina maydonidan xavfsiz harakatlanish, snaryadni belgilangan nuqtaga yetkazish, botqoqlikdan jamoaviy o‘tish, yashirin so‘zni topish va merganlik kabi sinovlar yoshlarning jamoaviylik, tezkorlik, chaqqonlik va tafakkur salohiyatini namoyon etishiga xizmat qildi. Bellashuvlarda nafaqat o‘g‘il bolalar, balki qizlar ham faol ishtirok etib, o‘zlarining shijoat, topqirlik va jismoniy tayyorgarlik darajasini ko‘rsatishdi. G‘olib jamoalar okrug qo‘mondonligi tomonidan diplom va esdalik sovg‘alari bilan taqdirlandi.

Shuningdek, Toshkent shahridagi Yangi O‘zbekiston bog‘ida “Yoshlar oyligi” doirasida “Yangi O‘zbekiston yoshlari — kelajak bunyodkori” shiori ostida keng ko‘lamli tadbir tashkil etildi. Tadbir Havo hujumidan mudofaa qo‘shinlari va Harbiy havo kuchlari qo‘mondonligi hamda O‘zbekiston Yoshlar ittifoqi Toshkent shahar kengashi hamkorligida o‘tkazildi.

Ushbu bayramona tadbir yoshlarning shijoat va ijodini yuzaga chiqaruvchi turli yo‘nalishlarda qizg‘in bellashuvlarga boy bo‘ldi: “Velopoyga”da kuch va bardosh, “Shaxmat-shashka turniri”da aql-zakovat, “Qo‘l jangi”da jasorat, “Yosh rassom”da esa tasavvur va qalb go‘zalligi namoyon bo‘ldi. “Oshpazlar bahsi” esa birligi mustahkam oilalar qadrini yana bir bor yodga soldi.

Ayniqsa, “Havo shari” ko‘rgazmasi, uchuvchilarning parashyutli chiqishlari, “Aviomobil” namoyishlari yoshlar nigohida porlagan hayrat va quvonch ifodalari bilan yodda qoldi.

Tadbir yakunida turli bellashuvlar g‘oliblariga diplomlar va esdalik sovg‘alari topshirildi. Shuningdek, O‘zbekiston Yoshlar ittifoqi Toshkent shahar kengashi tomonidan ham faol ishtirok etgan yoshlarga maxsus sovg‘alar ulashildi.

Mudofaa vazirligi Axborot va ommaviy kommunikatsiyalar departamenti