O‘zbekiston Respublikasi Mudofaa vazirligi

Qurolli Kuchlarimiz sha’nini ulug‘lovchi ushbu tadbirda Mudofaa vazirligi huzuridagi Jamoatchilik kengashi a’zolari, Chirchiq shahri nuroniylari, harbiy soha faxriylari hamda yoshlar ishtirok etdi.

Tadbir Vatan posbonlarining dadil va bardam harakatlari bilan to‘yingan qo‘l jangi ko‘rgazmasi bilan boshlandi. Har bir zarba, har bir harakat — yurtni asrashga tayyor qalblarning timsolidek taassurot qoldirdi. Shundan so‘ng, faxriy qorovul bo‘linmasining saf chiqishlari va marosimdagi qat’iyatli qadamlari yuraklarga g‘urur bag‘ishladi.

Tadbir davomida tashkil etilgan harbiy texnika va qurol-aslahalar ko‘rgazmasi esa yoshlar uchun haqiqiy ilhom manbaiga aylandi. Milliy armiyamizning texnik salohiyati, zamonaviy qurollar va ilg‘or jangovar tayyorgarlik vositalari bilan tanishgan yoshlar qalbida “Men ham Vatanimga xizmat qilaman!” degan ezgu niyatlar uyg‘ondi.

Tashrif buyuruvchilar, shuningdek, harbiy qismda yaratilgan o‘quv sinflari, sport inshootlari va yashash sharoitlarini ko‘zdan kechirishdi

Tadbirning eng hayajonli qismlaridan biri parashyut desantchilari tayyorlanadigan mashg‘ulot maydonida davom etdi. Yoshlar bu yerda parashyutdan sakrashga tayyorgarlik jarayonlarini katta qiziqish bilan kuzatdi.

Tadbir yakunida esa “Yangi O‘zbekiston yoshlari — kelajak bunyodkori” mavzusidagi davra suhbati tashkil etildi. Ishtirokchilar bugungi taassurotlar bilan o‘rtoqlashar ekan, yosh avlod hayotiga qaratilayotgan e’tibor, ularning orzu va intilishlari uchun yaratilayotgan imkoniyatlar haqida yurakdan so‘z yuritishdi.

Davra suhbatining badiiy yakuniga aylanib, Vatanga bag‘ishlab ijro etilgan kuy-qo‘shiqlar esa ko‘ngillarga chuqur kirib borib, yuraklarda faxr, g‘urur va vatanparvarlik tuyg‘ularini yana bir bor jo‘sh urdirdi.

Mudofaa vazirligi Axborot va ommaviy kommunikatsiyalar departamenti