Farg‘ona “Temurbeklar maktabi”da navbatdagi bitiruvchilar katta hayotga yo‘l oldi
2025-06-16 12:05:00 / Yangiliklar
Tadbirda Sharqiy harbiy okrug qo‘mondoni, davlat va jamoat tashkiloti vakillari, Qurolli Kuchlar faxriylari, o‘quvchilar hamda ularning ota-onalari ishtirok etdi.
Tadbir davomida bitiruvchi o‘quvchilarga diplomlar va ko‘krak nishonlari tantanali tarzda topshirildi. Bu marosim, nafaqat harbiy-akademik litseyda o‘quv yilining yakunlanishini, balki yoshlarning Vatanga xizmat qilish yo‘lidagi ilk qadamlari boshlanganini ham anglatdi.
Ta’kidlash joizki, bugungi kunda “Temurbeklar maktabi”da yosh avlodning intellektual, jismoniy va harbiy tayyorgarligini uyg‘unlashtirishga alohida e’tibor qaratilmoqda. Litseyda yaratilgan zamonaviy o‘quv-moddiy baza, ilg‘or o‘quv dasturlari, tajribali pedagoglar hamda malakali harbiy mutaxassislar ishtirokida olib borilayotgan mashg‘ulotlar yoshlarning vatanparvar, bilimli va irodali shaxs sifatida shakllanishiga xizmat qilmoqda.
Harbiy-akademik litsey o‘quvchilarining har yili o‘tkaziladigan fan olimpiadalari, sport musobaqalari va turli miqyosdagi tanlovlarda erishilayotgan natijalar, ayniqsa, oliy harbiy ta’lim muassasalariga o‘qishga kirayotgan bitiruvchilarning salmoqli ko‘rsatkichi bu dargohda ta’lim-tarbiya jarayoni izchil yo‘lga qo‘yilganidan dalolat beradi.
Tadbirda so‘zga chiqqanlar bitiruvchilarning bugungi yutuqlari, ularning kelgusi hayotdagi ustuvor maqsadlari va Vatan oldidagi mas’uliyatini alohida e’tirof etdilar. Bitiruvchilarning shijoati, mustahkam bilimga asoslangan tayyorgarligi va milliy g‘urur bilan yo‘g‘rilgan ma’naviyati ularning kelgusida O‘zbekiston Respublikasi Qurolli Kuchlari safida munosib xizmat qilishlariga ishonch bildirishdi.
Tadbirning badiiy qismida harbiy orkestr va faxriy qorovul chiqishlari taniqli san’atkorlar ishtirokidagi konsert dasturiga ulanib ketdi.
Sharqiy harbiy okrug matbuot xizmati