O‘zbekiston Respublikasi Mudofaa vazirligi

Mazkur yig‘in — harbiy psixologlar orasida bilim, tajriba va fidoyilikning chinakam sinoviga aylangan bo‘lib, ularning kasbiy tayyorgarligini yanada mustahkamlashga xizmat qildi. Tadbirning asosiy maqsadi — harbiy psixologlarning kasbiy malakasini oshirish, ularni zamonaviy psixodiagnostika, korrektsion metodlar, stressni boshqarish va uning profilaktikasi bo‘yicha chuqurroq bilim bilan qurollantirish, ilg‘or tajribalarni ommalashtirish hamda harbiy qismlarda professional muloqot muhitini shakllantirishdan iborat bo‘ldi.

Yig‘in davomida harbiy psixologlar uchun qator amaliy mashg‘ulotlar tashkil etildi. Mashg‘ulotlar harbiy xizmatchilarning ruhiy holatini baholash va doimiy monitoring qilish usullari, ularning ruhiy salomatligini aniqlash va holatga qarab zaruriy psixologik chora-tadbirlarni belgilashga qaratildi.

Shuningdek, og‘ir xizmat sharoitlarida yuzaga keladigan stress holatlariga qarshi samarali kurashish metodikasi, shaxsiy stressga chidamlilikni oshirish usullari ham chuqur tahlil qilindi. Psixologik maslahat va qo‘llab-quvvatlash tizimini yanada takomillashtirish, harbiy jamoalarda psixologik madadning uzluksiz va tizimli ravishda olib borilishini ta’minlash bo‘yicha amaliy ko‘nikmalar mustahkamlandi.

Bundan tashqari, ekstremal vaziyatlarda psixologik yordam ko‘rsatish algoritmlari, favqulodda holatlarda tezkor ruhiy barqarorlikni ta’minlash bo‘yicha aniq yondashuvlar o‘rganildi. Harbiy xizmatchilar bilan bir qatorda, ularning oila a’zolari bilan ishlash psixologiyasi ham alohida e’tiborga olinib, ijtimoiy-psixologik qo‘llab-quvvatlash tizimini har tomonlama rivojlantirish yo‘nalishida amaliy mashg‘ulotlar o‘tkazildi.

Dala o‘quv maydonida real holatlar asosida o‘tkazilgan interaktiv o‘yinlar va mashg‘ulotlar psixologlar o‘rtasida samarali tajriba almashish, kasbiy bilim va ko‘nikmalarni mustahkamlash imkonini yaratdi.

Yig‘in doirasida mutaxassislar o‘rtasida “Eng ilg‘or psixolog”  ham aniqlanib, unda ishtirokchilar o‘zlarining nazariy bilimlari bilan birga amaliy ko‘nikmalarini ham namoyish etdi. Jumladan, Nukus dala o‘quv maydonida o‘tkazilgan mashg‘ulotlar davomida jangovar tayyorgarlik, texnik tayyorgarlik, jismoniy va ma'naviy-ma’rifiy tayyorgarlik bo‘yicha ham yuqori darajadagi tayyorgarlik ko‘rsatildi.

Yakunda o‘z bilim va ko‘nikmalari bilan ajralib chiqqan harbiy psixologlar Shimoli-g‘arbiy harbiy okrug qo‘mondonligi tomonidan munosib taqdirlanib, Mudofaa vazirligi bosqichida ishtirok etish yo‘llanmasiga ega bo‘ldilar.

Shimoli-g‘arbiy harbiy okrug matbuot xizmati