O‘zbekiston Respublikasi Mudofaa vazirligi

Chirchiq oliy tank qo‘mondonlik muhandislik bilim yurtida oliy harbiy ta’lim muassasalari professor-o‘qituvchilari, sportchi kursantlar hamda professional sportchilar ishtirokida “Sport psixologiyasi tadqiqot metodlari” mavzusida davra suhbati tashkil etildi.

Tadbirda Olimpiada, jahon va Osiyo chempioni, kapitan Ruslan Nuridinov hamda tajribali murabbiy Tamila Kuchkarovalar tomonidan harbiy-professional faoliyat va atrof-muhitning psixologik bosimiga nisbatan inson organizmining moslashuvchanlik darajasini oshirish, sport musobaqalarida yuzaga keladigan psixologik holatlarni chuqur tahlil qilish, hamda mashg‘ulotlar jarayoniga yo‘naltirilgan psixologik ko‘rsatmalarni ishlab chiqish zarurligi yuzasidan fikr va takliflar ilgari surildi.

Davra suhbati rejasiga kiritilgan barcha ma’ruzalar ishtirokchilarda katta qiziqish uyg‘otdi, suhbatlar ilmiy tahlil va amaliy tavsiyalar bilan boyitildi. Tadbir davomida kursantlar va professor-o‘qituvchilar tomonidan berilgan savollarga mutaxassislar tomonidan batafsil va asosli javoblar berildi.

Tadbir yakunida “Sport psixologiyasi” yo‘nalishidagi bunday ilmiy-amaliy uchrashuvlarning harbiy xizmatchilar salomatligi, ruhiy barqarorligi va sportdagi muvaffaqiyatlariga ijobiy ta’sir ko‘rsatishi qayd etildi. Shuningdek, bu kabi tashabbuslarning muntazam ravishda tashkil etilishi zarurligi ta’kidlandi.
Mudofaa vazirligi Axborot va ommaviy kommunikatsiyalar departamenti