“Dolzarb 90 kun” — har bir yoshning shijoati va g‘ayratini oshirmoqda
2025-06-12 14:10:00 / Yangiliklar
Mahalla uzra bolalarning quvnoq kulgusi, shijoatga to‘la chaqiriqlari, g‘alaba sari intilgan irodasi yangradi. Uzoqdan qaraganda bu tadbir oddiy sport musobaqasidek tuyulishi mumkin, ammo unda yoshlarga nafaqat jismoniy chiniqish, balki Vatan tuyg‘usi, birlik va jasorat saboqlari singdirildi.
Musobaqaning ochilish marosimida mudofaa vaziri o‘rinbosari general-mayor Hamdam Qarshiyev bu kabi tadbirlar yoshlar qalbida Vatanga muhabbat hamda jasorat kabi tuyg‘ularini mustahkamlashga xizmat qilayotganini alohida ta’kidladi. Shuningdek, tadbirning samarali tashkil etilishida yaqindan ko‘mak bergan O‘zbekiston Yoshlar ittifoqi Toshkent viloyati kengashi va qator hamkor tashkilotlarga minnatdorlik bildirildi.
Musobaqa davomida ishtirokchilar “Chang‘ida harakatlanish”, “To‘siqlar yo‘lagidan o‘tish”, “Snaryadni xavfsiz joyga olib borish”, “Botqoqlikdan o‘tish” hamda “Merganlik mashqi” kabi qiziqarli va jismoniy tayyorgarlikni talab qiluvchi sinovlarda o‘zaro bellashdilar. Har bir shart bolalarda jismoniy bardoshlilik, tezkor fikrlash, muvozanatni saqlash hamda irodani mustahkamlashga xizmat qildi.
Ayniqsa, “Merganlik mashqi” shartida qizlar jamoasining namoyish etgan chaqqonligi va aniqligi tomoshabinlarning olqishiga sazovor bo‘ldi. Ushbu mashqda “Qizlar gvardiyasi” jamoasi alohida ajralib turdi.
Musobaqa yakunida umumiy hisobda faxrli birinchi o‘rinni “Lochinlar” jamoasi qo‘lga kiritdi. Qizlar o‘rtasida tashkil etilgan bellashuvda esa “Qizlar gvardiyasi” jamoasining qo‘li baland keldi. G‘olib jamoalarga Mudofaa vazirligining ko‘krak nishoni va esdalik sovg‘alari topshirildi.
Mudofaa vazirligi Axborot va ommaviy kommunikatsiyalar departamenti