Qashqadaryoda “Yosh harbiylar forumi” bo‘lib o‘tdi
2025-06-12 11:55:00 / Yangiliklar
O‘zbekiston yoshlar ittifoqi Qashqadaryo viloyati Kengashi hamda Yoshlar ishlar boshqarmasi bilan hamkorlikda tashkil etilgan tadbirda uzoq yillik tajribaga ega harbiy xizmatchilar tomonidan xizmatni sifatli tashkil etishda muhim bo‘lgan omillar yuzasidan ma’ruzalar qilindi.
Shuningdek, bosh serjantlar korpusining milliy armiyamizda tutgan o‘rni borasida hamda yoshlarni harbiy-vatanparvarlik ruhida tarbiyalashda harbiy xizmatchilarning roli haqida mulohazalar o‘rtaga tashlandi.
Qarshi shahridagi Turon universiteti professor ustozlari tomonidan qilingan “Oila qurishda ahamiyatli bo‘lgan omillar” mavzusidagi ma’ruza ham katta hayotga endigina qadam qo‘yayotgan har bir yosh uchun muhim tavsiyalarga boy bo‘ldi.
Forum davomida xizmatida turli yutuqlarga erishgan, kreativ fikrga, yaratuvchanlik qobiliyatiga ega yosh harbiy xizmatchilar ham so‘z olib, bugungi kunda yoshlarga yaratib berilayotgan imkoniyatlar, berilgan imtiyozlar haqida fikr bildirishdi.
Forumda faol ishtirok etganlar okrug qo‘mondonligi hamda hamkor tashkilotlar tomonidan taqdirlandilar. Yakunda mehmonlar uchun innovatsion ishlanmalar ko‘rgazmasi bilan yaqindan tanishib, okrugning shonli tarix muzeyiga sayohat qilishdi.
Janubi-g‘arbiy maxsus harbiy okrug matbuot xizmati