O‘zbekiston Respublikasi Mudofaa vazirligi

Mazkur tanlov – bu oddiy bir musobaqa emas, balki harbiy psixologlar orasidagi bilim, tajriba va fidoyilikning chinakam sinovi bo‘ldi. Asosiy maqsad — psixologik xizmat samaradorligini oshirish, ilg‘or g‘oya va tajribalarni ommalashtirish, harbiy psixologlarning salohiyatini aniqlash hamda ularning kasbiy faoliyatiga yuksak baho berishdan iborat edi. Shu bilan birga, tanlov orqali sog‘lom raqobat ruhi, tashabbuskorlik muhiti va amaliy bilimlarni mustahkamlashga alohida e’tibor qaratildi.

Tadbirni baholashda xolislikni ta’minlash maqsadida tajribali mutaxassislardan iborat hay’at a’zolari ishtirokchilarning har bir chiqishini chuqur tahlil qilib, adolat va xolislik mezonlari asosida baholab bordilar. Ulug‘ vazifani zimmasiga olgan harbiy psixologlar "Sog‘lom raqobat – kelajak poydevori" shiori ostida saf tortib, bilim, tajriba va ichki dunyo kuchini sinovdan o‘tkazdilar.

Tanlov davomida ishtirokchilar o‘zlarining nafaqat nazariy bilimlarini, balki amaliy ko‘nikmalarini ham yuqori darajada namoyish etib, harbiy xizmatning murakkab ruhiy muhitiga qanday psixologik yondashuvlar kerakligini amalda isbotladilar. Har bir savol, har bir topshiriq – ularning bardoshi, bilim darajasi va tahliliy tafakkuriga qaratilgan edi.

Tanlov yakunlariga ko‘ra quyidagi ishtirokchilar g‘olib deb topildi:

• 1-o‘rin – Leytenant Xoshimov Bourxon Namoz o‘g‘li;
• 2-o‘rin – Katta leytenant Abdisattorov Javohir Baxtiyor o‘g‘li;
• 3-o‘rin – Katta leytenant Olimov Azamat Qahramon o‘g‘li.

Faxrli birinchi o‘rinni qo‘lga kiritgan leytenant Xoshimov Bourxon Namoz o‘g‘li endilikda Mudofaa vazirligi miqyosida o‘tkaziladigan bosqichda ishtirok etadi.

Mudofaa vazirligi Axborot va ommaviy kommunikatsiyalar departamenti