O‘zbekiston Respublikasi Mudofaa vazirligi

30-may—1-iyun kunlari nufuzli musobaqada 32 ta davlatning 400 ga yaqin eng kuchli sportchilari ishtirok etishdi. Unda O‘zbekiston sharafini 18 nafar qo‘l jangi ustalari (12 nafar erkaklar va 6 nafar ayollar) himoya qildi.

O‘zbekiston terma jamoasi 8 ta oltin, 3 ta kumush, 3 ta bronza medal olib, faxrli 1-o‘rinni egalladi. 2-o‘rin 4 ta oltin, 2 ta kumush, 2 ta bronza medali bilan Rossiya jamoasiga, 3-o‘rin esa 2 ta oltin, 6 ta kumush, 4 ta bronza medal bilan Qozog‘iston jamoasiga nasib etdi.

Oʻzbekiston kuch tuzilmalari hamda huquqni muhofaza qilish organlari sportchilaridan iborat terma jamoamiz erishgan yutuqlar faqat bugina emas. Xususan, O‘zbekiston milliy terma jamoasi ushbu tarkib bilan joriy yilning 3—8-iyun kunlari Gretsiyaning Lutraki shahrida o‘tkazilgan “VIII-Butunjahon sport o‘yinlari-2025” musobaqasida ham mutlaq g‘oliblikni qo‘lga kiritdi.

Ushbu musobaqaga 60 ga yaqin davlatlardan tashrif buyurgan ishtirokchilar 28 ta sport turi bo‘yicha o‘zaro bellashdilar. Shundan 15 ta davlat — O‘zbekiston, Ukraina, Moldova, Fransiya, Avstriya, Germaniya, Shveysariya, Ruminiya, Eron, Ozarbayjon, Italiya, Chexiya, Isroil, Gretsiya, Niderlandiya jamoalari qo‘l jangi sport turi bo‘yicha g‘oliblik uchun kuch sinashishdi.

Murosasiz va qizg‘in bellashuvlar ostida o‘tgan janglarning yakuniy natijalariga ko‘ra, O‘zbekiston qo‘l jangi ustalari 13 ta oltin, 3 ta kumush va 1 ta bronza medalini qo‘lga kiritib, umumjamoa hisobida birinchi o‘rinni egallashdi.

Mazkur musobaqada ikkinchi o‘rin 8 ta oltin, 5 ta kumush va 3 ta bronza medal bilan Ukraina jamoasiga va uchinchi o‘rin 2 ta oltin, 4 ta kumush va 3 ta bronza medal bilan Germaniya jamoasiga nasib qildi.

Quvonarlisi, mazkur musobaqalarda Mudofaa vazirligi harbiy xizmatchilari ham munosib ishtirok etib, O‘zbekiston terma jamoasini umumjamoa hisobida birinchi o‘ringa olib chiqishda o‘zlarining hissalarini qo‘shdilar. Jumladan, Bursada bo‘lib o‘tgan VIII Jahon chempionatida ayollar o‘rtasida kontrakt bo‘yicha harbiy xizmatchi oddiy askar Mahliyo Habibullayeva 64 kg vazn toifasida oltin, Lutrakida o‘tkazilgan “VIII-Butunjahon sport o‘yinlari-2025” musobaqaning jang yo‘nalishida oddiy askar Bahrom Olimjonov 70 kg vazn toifasida kumush medalni qo‘lga kiritdi.

Butunjahon sport o‘yinlari musobaqasi ikki yilda bir marta o‘tkaziladigan, nufuzi jihatidan Olimpiada o‘yinlaridan keyingi o‘rinda turadigan muhim sport tadbiri hisoblanadi. 2023-yilda Italiyada bo‘lib o‘tgan Butunjahon sport o‘yinlari tadbirlari ro‘yxatiga ilk bora qo‘l jangi sport turi ham kiritilib, unda ishtirok etgan O‘zbekiston milliy terma jamoasi birinchi o‘rinni qo‘lga kiritgan edi. 

Kecha, 8-iyun kuni ikki xalqaro musobaqa g‘oliblari Islom Karimov nomidagi Toshkent xalqaro aeroportida tantanali ravishda kutib olindi. Tantanali tadbirda Mudofaa va Sport vazirliklarining mutasaddilari, O‘zbekiston huquqni muhofaza qilish organlari qo‘l jangi Federatsiyasi rahbariyati, OAV vakillari va sportchichlarning yaqinlari ishtirok etdi. Rasmiylar ushbu natija bilan terma jamoamizni tabriklab, oldinda turgan muhim musobaqalarda ham omad va zafarlar tiladilar.

Mudofaa vazirligi Axborot va ommaviy kommunikatsiyalar departamenti