Ushbu tadbir xorijiy tillarni o‘qitishning dolzarb masalalarini chuqur tahlil qilish, ilg‘or tajribalarni targ‘ib etish va ta’lim jarayonida innovatsion yondashuvlarni joriy etish maqsadida tashkil etildi.

Konferensiyada O‘zbekiston davlat jahon tillari universiteti, Mirzo Ulug‘bek nomidagi O‘zbekiston milliy universiteti, Toshkent tibbiyot universiteti, Markaziy Osiyo universiteti kabi nufuzli oliy ta’lim muassasalarining yetakchi olim va mutaxassislari, shuningdek, Qurolli Kuchlar Akademiyasining professor-o‘qituvchilari, ilmiy xodimlari va tajribali pedagoglari faol ishtirok etdilar.

Tadbir davomida xorijiy tillarni o‘rgatishda an’anaviy usullar bilan zamonaviy, innovatsion yondashuvlarning samarali uyg‘unligi, til o‘rganish samaradorligini oshirish yo‘llari, ilg‘or xorijiy tajribalar asosida yangi pedagogik texnologiyalarni tatbiq qilish, uslubiy va texnologik muammolarni aniqlash hamda ularni bartaraf etish masalalari atroflicha muhokama qilindi.

Shuningdek, konferensiya qatnashchilari tomonidan xorijiy tillarni o‘qitishda axborot-kommunikatsiya texnologiyalarining imkoniyatlaridan keng foydalanish, ta’lim jarayoniga interaktiv metodlarni joriy etish, zamonaviy didaktik vositalardan samarali foydalanish kabi taklif va tavsiyalar ilgari surildi.

Yakunda ilmiy-amaliy natijalarga asoslangan tavsiyalar ishlab chiqildi hamda ta’lim muassasalari o‘rtasida o‘zaro hamkorlikni yanada kuchaytirish bo‘yicha kelishuvlarga erishildi.

Mudofaa vazirligi Axborot va ommaviy kommunikatsiyalar departamenti