Sayyor qabul orqali amaliy ko‘mak
2025-05-30 10:40:00 / Yangiliklar
Mazkur sayyor qabulda Sharqiy harbiy okrug qo‘shinlari qo‘mondoni o‘rinbosari, Farg‘ona harbiy prokurori, shuningdek, davlat va jamoat tashkilotlari vakillari ishtirok etdi. Tadbir davomida harbiy xizmatchilar, ularning oila a’zolari, faxriylar hamda Qurolli Kuchlar ishchi-xizmatchilarining murojaatlari bevosita mutasaddilar tomonidan tinglandi va har tomonlama o‘rganildi.
Kun davomida 50 ga yaqin murojaat ko‘rib chiqildi. Ular orasida tibbiy xizmatdan foydalanish, ish bilan ta’minlash, hujjatlarni rasmiylashtirish, bolalarni maktab va bog‘chalarga joylashtirish, ijtimoiy yordam masalalari bo‘yicha murojaatlar asosiy o‘rinni egalladi. Murojaatlarning 10 dan ortig‘i shu kunning o‘zida ijobiy hal etildi. Yechimi muayyan vaqt talab qiladigan masalalar bo‘yicha esa mas’ul idoralarga tegishli topshiriqlar berilib, ularning ijrosi qat’iy nazoratga olindi.
Sayyor qabul davomida harbiy xizmatchilar va ularning yaqinlariga huquqiy maslahatlar berildi, mavjud tartib-qoidalar yuzasidan batafsil tushuntirishlar o‘tkazildi.
Tadbir yakunida ishtirokchilar tomonidan bildirilgan fikr-mulohazalar, taklif va tavsiyalar kelgusida shu kabi sayyor qabullar samaradorligini oshirishda muhim omil bo‘lib xizmat qilishi ta’kidlandi.
Sharqiy harbiy okrug matbuot xizmati