O‘zbekiston Respublikasi Mudofaa vazirligi

Xususan, poytaxtimizdagi “Turkiston” sanʼat saroyida taqdimoti oʻtkazilgan navbatdagi “Vatan manzumasi” dasturida ham ana shunday ezgu tushuncha va qadriyatlar, ibratli fazilatlar oʻziga xos talqinlarda aks ettirildi.

O‘zbekiston Respublikasi Mudofaa vazirligi, Madaniyat vazirligi, Yozuvchilar uyushmasi, Respublika Ma’naviyat va ma’rifat markazi va boshqa tashkilotlar hamkorligida tashkil etilgan adabiy-ma’rifiy dastur Qurolli Kuchlar tizimida olib borilayotgan yangicha islohotlar tufayli yurtimizda shakllangan “Xalq va armiya – bir tanu bir jon!” degan ezgu an’anani, ayniqsa, ijodkorlar va harbiy xizmatchilar orasida yakdillikni yanada mustahkamlash, yoshlarni harbiy-vatanparvarlik va milliy qadriyatlarimizga hurmat ruhida tarbiyalashni maqsad qilib olgan.

Ma’rifiy kecha O‘zbekiston Respublikasi madhiyasi bilan boshlanib, kuy-qo‘shiqlar, ash’orlarga ulanib ketadi. Har bir detalgacha nazardan chetda qolmagan ushbu dastur yurtimizning taniqli xonandalari, aktyor, shoir-u shoiralari, harbiylardan tashkil topgan bir guruh iste’dodli yoshlar va ustozlarni bir joyga jamladi.

Tadbirni kuzatar ekansiz, o‘z yurtini, elini sevish, ardoqlash kabi baland hissiyotlarni qo‘zg‘ovchi, alangalatuvchi, o‘stiruvchi “Vatan manzumasi” har kuni, har hududda o‘tkazilishi kerak degan o‘y-fikrlar o‘tadi ko‘nglingizdan. Quvonarlisi, zalni to‘ldirib turgan tomoshabinlar zarracha bo‘lsa ham zerikish hissini tuymadi, ular har bir sahna ko‘rinishini qarsaklar bilan kutib oldi.

Tadbir so‘ngida 2000-yili Sariosiyo voqealarida Vatan tinchligi yo‘lida halok bo‘lgan qahramonlarimiz yod etildi. O‘zbekiston xalq shoiri Sirojiddin Sayyidning mard va jasur yigitlarimiz xotirasiga bag‘ishlangan “O‘g‘lonlar” she’ri tomoshabinlar e‘tiboriga havola qilindi. Yosh ijodkorlar tomonidan ijro etilgan ushbu she’r dasturning kulminatsiyasi bo‘ldi.

Shu yurtning tuprog‘ini ko‘z qorachig‘idek asrash muqaddas burchimizdir. “Vatan manzumasi”da ham yoshlarni vatanparvarlik ruhida tarbiyalash, yurtimiz sarhadlarini begona ko‘zlardan asrashdek ulug‘ g‘oyalar ko‘zda tutilgan.

Mudofaa vazirligi Axborot va ommaviy kommunikatsiyalar departamenti