Özbekiston Respublikasi Mudofaa vazirligi

Tantanali ochilish marosimida O‘zbekiston Respublikasi mudofaa vaziri general-mayor Shuxrat Xalmuxamedov so‘zga chiqib, barcha ishtirokchilarni yurtimizda ikkinchi bor o‘tkazilayotgan mazkur festival bilan qutlab, mamlakatimiz mudofaasi uchun o‘z hissasini qo‘shayotgan tadbirkorlarga minnatdorlik bildirdi.

Ta’kidlash kerakki, so‘nggi yillarda Qurolli Kuchlarimiz Oliy Bosh qo‘mondoni Shavkat Mirziyoyev rahbarligida milliy armiyamiz qiyofasini tubdan o‘zgartirish, harbiy sohaga oid innovatsion g‘oyalar hamda texnologiyalarni keng joriy etish, shuningdek, ilmiy-tadqiqot, tajriba-konstruktorlik tadbirlarini samarali yo‘lga qo‘yish borasida keng ko‘lamli amaliy ishlar olib borilmoqda.

Yurtimizda zamonaviy mudofaa sanoati sohasida ham qisqa davrda tub islohotlar amalga oshirildi, yangi zavod va korxonalar barpo etilib, zamonaviy texnologiya va uskunalar olib kelindi. Mavjud harbiy zavodlarimiz modernizatsiya qilindi. Harbiy-texnik sohada 50 ga yaqin davlatlar bilan hamkorlik o‘rnatilib, 30 dan ortiq ilg‘or xorijiy kompaniyalar bilan shartnomalar imzolandi. 40 ta mahalliy korxonalar bilan hamkorlik yo‘lga qo‘yildi. Ishlab chiqarilayotgan mahsulot turlari 155 taga yetkazilib, xizmat ko‘rsatish 2,5 barobarga oshirildi.

Innovatsion g‘oyalarni amaliyotda sinovdan o‘tkazish, yoshlar o‘rtasida zamonaviy texnologiyalarga qiziqishni yanada  kuchaytirish va muhandislik sohalariga keng jalb qilish, ishlab chiqaruvchi mahalliy korxona va tashkilotlarni mudofaa sanoati sohasiga yo‘naltirish maqsadida “G‘alaba bog‘i” yodgorlik majmuasi hududida, mana ikki yildirki,  mudofaa sohasidagi innovatsion texnologiyalar festivali tashkil etiladi.

Festivalning bu yilgi tadbirlari doirasida ham mudofaa sanoatiga oid zamonaviy qurol-yarog‘ va harbiy texnikalar, robototexnikalar, kimyo-texnologiyalari, kon-metallurgiya sohasi hamda harbiy va ikki hil maqsadlarga mo‘ljallangan maxsulotlar ko‘rgazmasi namoyish etiladi.

Shuningdek, ko‘rgazma doirasida ishtirokchi kompaniyalarning “B2B” biznes tadbirlari, ya’ni muzokaralar o‘tkazilishi rejalashtirilgan. Undan tashqari, festival doirasida yoshlar o‘rtasida “Kiber sport”, “Xakerlik ustasi”, “Dasturlash”, “3D modellashtirish texnologiyalari”, “Robotlar jangi”, Uchuvchisiz uchish apparatlarini loyihalashtirish”, “Raketamodel”, “Dron-reysing” va “Kelajak transport texnologiyalari robototexnikasi” yo‘nalishlarida musobaqalar o‘tkaziladi.

Dasturlash va robototexnikaga qiziqadigan yoshlarimiz uchun ushbu festival o‘z g‘oyalarini ro‘yobga chiqarish hamda sohadagi bilimlarini yanada rivojlantirish yo‘lida birinchi qadam bo‘ladi. Festivalda saralab olingan iqtidorli yoshlar va fuqarolarga kelgusida Mudofaa sanoati korxona va zavodlarida o‘zlarining ishlanmalarini ishlab chiqarishni yo‘lga qo‘yishlari va ishga joylashishlari uchun keng imkoniyatlar yaratiladi.

Festival davomida rejalashtirilgan ko‘rgazma va musobaqalar o‘zaro hurmat, sog‘lom raqobat, chinakam vatanparvarlik ruhida o‘tishi va yorqin lahzalarga boy bo‘lishi kutilmoqda.

“MSITF—2025” tadbirlari 29-, 30- va 31-may hamda 1-iyun kunlari davom etadi.

Mudofaa vazirligi Axborot va ommaviy kommunikatsiyalar departamenti