O‘zbekiston Respublikasi Mudofaa vazirligi

Musobaqada ishtirok etgan yoshlar nafaqat jismoniy tayyorgarlik, balki murakkab sharoitlarda to‘g‘ri va muvozanatli harakatlana olish, jamoada ishlash, fidoyilik ko‘rsatish va yetakchilik qobiliyatlarini ham amalda namoyon etdilar.

Musobaqaning har bir bosqichi – bu iroda, jasorat va qat’iyat sinovi edi. Ishtirokchilar o‘quv granatasini uloqtirish, turnikka tortilish, jangovar qurolni qismlarga ajratib-terish, qisqa va uzoq masofalarga yugurish kabi harbiy-sport sinovlarida bellashdilar. Har bir harakat, har bir ter to‘kilgan lahza – bu yurtga bo‘lgan muhabbatning amaliy ifodasidir.

Musobaqaning eng yorqin daqiqalaridan biri, albatta, Kattaqo‘rg‘on tumanining “Qalqon” jamoasi erishgan g‘alaba bo‘ldi. Barcha sinovlarda yuqori natijalarga erishgan bu jamoa viloyat faxriga aylandi va endilikda respublika bosqichida Samarqand viloyati sharafini himoya qiladi. Bu yutuq nafaqat bir jamoaning, balki minglab yoshlarimizning qalbida Vatanga bo‘lgan sadoqat ramziga aylandi.

Darhaqiqat, “Shijoat va g‘ayrat” musobaqasi ishtirokchilari o‘z irodasi, jasurligi va jismoniy tayyorgarligi orqali boshqalarga ham ibrat bo‘lyapti. Har bir yosh bu kabi musobaqalarda ishtirok etish orqali o‘zining imkoniyatlarini kashf etadi, o‘ziga bo‘lgan ishonchi ortadi. Eng muhimi – Vatanga xizmat qilishga bo‘lgan ruhiy tayyorgarligi mustahkamlanadi.

Bugun bizga bilimli, jismonan sog‘lom, ma’naviy barkamol yoshlar kerak. Ana shunday avlodni tarbiyalash yo‘lida har bir musobaqa – bu maktab, har bir jamoaviy g‘alaba – bu yurtga bo‘lgan sadoqatning timsolidir.  

Markaziy harbiy okrug matbuot xizmati