O‘zbekiston Respublikasi Mudofaa vazirligi

Mudofaa vazirligida innovatorlik faoliyati ishlanmalarini ishlab chiqarishga yo‘naltirish va loyiha mualliflarini moddiy rag‘batlantirish maqsadida Zangiota tumanida joylashgan harbiy qismda innovatsion ishlanmalar ko‘rgazmasi “TechnoWays-2025” festivali tashkil etildi.

Unda O‘zbekiston Respublikasi Mudofaa vazirligi qo‘shinlari va ta’lim muassasalaridan ishtirokchilarning eng yaxshi ishlanmalari namoyish etildi.

Festival ikki qismdan iborat bo‘lib, birinchi qismda harbiy xizmatchilar tomonidan yaratilgan innovatsion loyihalar ko‘rgazmasi tashkil etildi. Unda mamlakatimizning mudofaa salohiyatini yuksaltirish, shuningdek, jangovar  va kundalik xizmatda foydalanishda harbiy xizmatchilarga qulayliklar yaratadigan loyihalar namoyishi bo‘lib o‘tdi.

Festivalning ikkinchi qismida harbiy xizmatchilarning innovatsion g‘oyalarini amalga oshirish va qo‘shinlar hayotiga tatbiq qilishlari uchun “Bo‘lajak olim” tanlovi o‘tkazildi.

Takidlash joizki, mazkur ishlanmalar kelgusida xalqaro ko‘rgazmalarda ishtirok etishi ko‘zda tutilgan hamda g‘olib deb topilgan loyihalar Mudofaa sanoati agentligi bilan hamkorlikda ishlab chiqarishga yo‘naltiriladi.

“Bo‘lajak olim” tanlovi so‘nggi marta 2023-yilda o‘tkazilgan bo‘lib, unda jami 50 dan ortiq loyihalardan 13 tasi 1 mlrd 200 mln so‘m miqdorida moliyaviy rag‘batlantirilgan.

Mudofaa vazirligi Axborot va ommaviy kommunikatsiyalar departamenti