O‘zbekiston Respublikasi Mudofaa vazirligi

Qurolli Kuchlar Davlat muzeyi o‘z faoliyatini 1965-yilda sobiq Turkiston harbiy okrugi Markaziy ofitserlar saroyida boshlagan bo‘lib, bugungi kunda Markaziy Osiyo mintaqasidagi eng yirik harbiy-tarixiy muzeylardan biri hisoblanadi. Muzey fondi 25 mingdan ortiq noyob eksponatlar bilan boyitilgan bo‘lib, ular orasida tarixiy, moddiy va ma’naviy ahamiyatga ega bebaho meros namunalarini uchratish mumkin.

Muzey jamoasi tomonidan olib borilayotgan ilmiy, tarbiyaviy va ma’rifiy faoliyatlar yildan-yilga takomillashib, yoshlarni Vatanga sadoqat, tarixiy merosga hurmat va harbiy xizmatga mas’uliyat bilan qarash ruhida tarbiyalashga xizmat qilmoqda. Ayniqsa, Jaloliddin Manguberdi, Amir Temur kabi buyuk sarkardalarning jasoratli faoliyati asosida yaratilgan ko‘rgazmalar yosh avlod uchun o‘rnak bo‘lmoqda.

2023-yilda Madaniy meros agentligi tomonidan muzeyga “Oliy toifali muzey” maqomi berildi. Bu maqom respublikamizda faoliyat yuritayotgan 100 dan ortiq muzeylar orasida faqat ayrimlarigagina berilgan bo‘lib, bu yutuq muzey jamoasining fidokorona mehnatiga berilgan yuksak bahodir.

Tadbirda Mudofaa vazirining tarbiyaviy va mafkuraviy ishlar bo‘yicha o‘rinbosari general-mayor Hamdam Qarshiyev ishtirok etib, muzey jamoasini muborak sana bilan tabrikladi. Tadbir davomida faxriy mehmonlar so‘zga chiqib, muzey faoliyatiga oid iliq tilaklarini bildirdilar.

Tadbirning badiiy qismida Mudofaa vazirligi namunali ko‘rgazmali harbiy orkestri, Qurolli Kuchlar Markaziy ashula va raqs ansambli, Toshkent shahrining Yashnobod tumanidagi 153-sonli maktab o‘quvchilari tomonidan tayyorlangan chiqishlar namoyish etildi.

Qurolli Kuchlar Davlat muzeyi kelgusida ham yosh avlodni Vatanga muhabbat ruhida tarbiyalashda, xalqimiz tarixiy merosini asrab-avaylash va targ‘ib etishda muhim rol o‘ynashda davom etadi.
Mudofaa vazirligi Axborot va ommaviy kommunikatsiyalar departamenti