O‘zbekiston Respublikasi Mudofaa vazirligi

Turkiyaning Isparta shahridagi “Komando” togʻ-oʻquv mashqlar markazida oʻtkazigan musobaqada Oʻzbekiston, Turkiya, Pokiston, Qatar, Ozаrbayjon, Italiya, Birlashgan Arab Amirliklari singari oʻndan ortiq davlat, shuningdek kuzatuvchi maqomida Turkmaniston, Qozog‘iston, Buyuk Britaniya va Quvayt ishtirok etdi. Musobaqa ishtirokchilari guruhlarga boʻlinib, bir-biridan murakkab 15 ga yaqin shartlar boʻyicha bahs olib bordi.

Xususan, harbiy jamoalar “Yuqori burchak ostida oʻq otish”, “Gazniqob taqib, jangovar oʻq otish”, Noaniq masofalarga noqulay istehkomdan oʻq otish”, Turli toʻsiqlar ortidan oʻq otish”, Havodagi vertolyotdan oʻq otish”, Orolni himoya qilish va qayiqdan jangovar oʻq otish”, “Nishonga sezdirmay yaqinlashib oʻq otish”, “5 km masofadan yuk va qurol bilan yugurib kelib, sovuq stvoldan oʻq otish”, “Tunda nomalum masofalarga oʻq otish” va “Syurpriz” shartlarini bajardi. 

Vazifalar – murakkab. Harbiylarimiz nishonlarni muddatidan oldin yakson etib, nimalarga qodir ekanliklarini amalda isbotladi.

Qariyib 10 kun davom etgan bellashuvlarda xorijiy davlat armiyalarining 48 ta jamoasi ichida Oʻzbekiston Mudofaa vazirligi harbiy xizmatchilari faxrli 1-oʻrinni qoʻlga kiritdi va oltin medalga sazovor bo‘ldi.

Eslatib o‘tamiz, Turkiyada oʻtkaziladigan mazkur musobaqada Oʻzbekiston Respublikasi Mudofaa vazirligi jamoasi 4-marotaba ishtirok etmoqda va 2022-2023 yillarda 2-oʻrinni hamda 2024-2025 yillarda 1-oʻrinni egallab kelmoqda.

Ta’kidlash kerakki, bunday xalqaro musobaqalarda ishtirok etish harbiylarimizning jangovar tayyorgarligini oshirish, bilim va tajriba almashishida muhim oʻrin tutadi.

Mudofaa vazirligi Axborot va ommaviy kommunikatsiyalar departamenti