O‘zbekiston Respublikasi Mudofaa vazirligi

Shu ma’noda, Janubi-g‘arbiy maxsus harbiy okrug tasarrufidagi Xayrobod garnizonida joylashgan harbiy qismda muddatli harbiy xizmatchilar bilan uchrashuv tashkil etildi.

«Yangi O‘zbekiston armiyasi – mamlakat qudrati, yuksak g‘urur va sadoqat timsolidir» shiori ostida o‘tkazilgan tadbirda «Vazir va yoshlar uchrashuvi» formatidagi muloqot orqali askarlarga yurtimizdagi islohotlar mazmun-mohiyati, harbiy xizmatning sharafi va mas’uliyati kabi tushunchalar yana bir bor chuqur anglatildi.

Uchrashuv davomida O‘zbekiston Respublikasi mudofaa vaziri general-mayor Shuxrat Xalmuxamedov jismonan baquvvat, aqlan va ma’nan kamolga yetgan yoshlar yurtimiz taraqqiyotining muhim tayanchi va ishonchli kelajagi ekaniga urg‘u berar ekan, harbiy xizmat faqatgina majburiyat emas, balki ulug‘vor burch, yuksak sharaf, katta mas’uliyat ekanini alohida ta’kidladi.

Chindan ham Vatan himoyachisi bo‘lish har kimga ham nasib etavermaydigan, bag‘rikenglik, matonat va sadoqat talab etuvchi yuksak vazifa. Chunki yurt muhofazasida turgan har bir askar bu – Yangi O‘zbekistonning mustahkam tayanchi hisoblanadi.

Shundan so‘ng, yurt himoyasiga bel bog‘lagan yigitlar Vatan, xalq, tinchlik kabi muqaddas tushunchalarni madh etuvchi she’rlar, termalar va dostonlar ijro etishdi. Yoshlarning bu kabi ijodiy chiqishlari tadbirga yuqori ko‘tarinkilik, samimiy kayfiyat baxsh etdi.

O‘ziga xos chiqishlardan mamnun bo‘lgan mudofaa vaziri bir qator yoshlarni esdalik nishonlari bilan taqdirlar ekan, ijodkorlik va yuksak ma’naviyat harbiy xizmatda ham, hayotda ham ruhiy tayanch bo‘lib xizmat qilishini aytib o‘tdi.

– Harbiy qismga kelganimga ko‘p bo‘lmagan bo‘lsada, surxon vohasining milliy etnomadaniyatiga bo‘lgan qiziqishim kuchaydi. Hozirda do‘mbira va chanqovuz chalishni o‘rganyapman. Bugun mudofaa vaziri va mehmonlarga do‘mbira chertib, terma aytib berdim, – deydi Farg‘ona viloyati Dang‘ara tumanidan muddatli harbiy xizmatga kelgan oddiy askar Jaloliddin Mamasoliyev.

Erkin va samimiy ruhda o‘tgan uchrashuv harbiy xizmatchilarning ma’naviy ruhiyatini yanada oshirdi, ularda Vatan himoyasiga bo‘lgan mas’uliyat, iftixor va sadoqat tuyg‘ularini mustahkamladi. Yoshlar o‘zlarini qiziqtirgan savollarga bevosita mudofaa vaziridan javob olgani esa, barchaga birdek shijoat bag‘ishladi.

Shubhasiz, bunday uchrashuvlar Vatan himoyachilarining ma’naviy-axloqiy kamoloti va yurtga sadoqatini kuchaytirishda muhim omil bo‘lib xizmat qiladi.