O‘zbekiston Respublikasi Mudofaa vazirligi

9-may — Xotira va qadrlash kuni munosabati bilan Yangiyo‘l shahridagi Havo hujumidan mudofaa va Harbiy havo kuchlari qo‘mondonligiga qarashli harbiy qismda tashkil etilgan “Uch avlod uchrashuvi” ana shunday mangu nur egalaridan biri — Shermuhammad Ashirov xotirasiga bag‘ishlandi.

Shermuhammad Ashirov... bu ism bugun har bir yangiyo‘llikning yuragida ohang bo‘lib jaranglaydi. Uning hayoti sahifalarga sig‘maydigan jasorat dostonidir. U Surxondaryo tuprog‘ida — tarix zaminining og‘ir sinovlaridan birida, Sariosiyo tumanidagi janglarda yurt sha’nini ko‘ksiga qalqon qilib, mardlarcha halok bo‘ldi. Dushmanga qaddini bukmadi, orini yerga urmadi, vatanparvarlik nima ekanini butun dunyoga namoyon etdi. Uning yuragi to‘xtadi, ammo jasorati barhayot qoldi. Uning ovozi jim bo‘ldi, biroq ismi yuraklarda baralla yangradi. Vafotidan so‘ng berilgan II darajali “Shon-sharaf” ordeni — bu jasoratga bitilgan unutilmas muhrdir.

Tadbir davomida maktab o‘quvchilari, faxriylar va harbiy xizmatchilar bir safda turib, mard o‘g‘lonni ehtirom bilan yodga oldilar. Har bir avlod vakili o‘z nigohi bilan vaqt ko‘prigidan o‘tib, jasorat darsini yuraklari bilan his qildi. Namoyish etilgan videoroliklarda Shermuhammad Ashirovning hayoti, orzulari, kurashi go‘yo film kabi ko‘z oldimizda jonlandi — yigitning har bir qadami, har bir so‘nggi nafasigacha bo‘lgan fidoyiligi yuraklarga sekin, ammo chuqur kirib bordi.

Uchrashuv davomoda mehmonlarning samimiy, yurakdan chiqqan so‘zlari esa tinglovchilarning qalbiga to‘g‘ridan-to‘g‘ri yo‘l topdi. Ularning har bir jumlasi — kechagi fidoyilikni bugungi tinchlik bilan bog‘laydigan ko‘prik edi. Bu gaplar yoshlarning qalbiga ezgulik urug‘ini sepdi, yurtga muhabbatini uyg‘otdi.

Tadbirning esda qolarli lahzalaridan biri Shermuhammad Ashirovning onasi bilan uchrashuvda bo‘ldi. Uch avlod vakillari bu mard o‘g‘lonni dunyoga keltirgan, uni el uchun tarbiyalagan onaga chuqur ta’zim qildilar. Onaning ko‘zida o‘g‘liga bo‘lgan cheksiz sog‘inch, yuragida esa faxr va armon bir paytning o‘zida mujassam edi. U ona yuragi edi — baxt va iztirob, faxr va ko‘z yoshi bilan yo‘g‘rilgan yurak.

Darhaqiqat, bu kabi tadbirlar — o‘tmish bilan bugun o‘rtasidagi ko‘zga ko‘rinmas, ammo qalblarda seziladigan mehr halqasidir. Bu — tarixni unutmaslik, qahramonlar xotirasini muqaddas bilish, ulardan ibrat olish, ularning nomini yurakda saqlab yashash demakdir. Axir, mard o‘g‘lonlarning jasorati yodga olinmas ekan, tinchlik qadri to‘liq anglanilmaydi. Jasorat — bu faqat o‘tmish emas, bu — kelajakni nurafshon qiluvchi ma’naviy yo‘lchi yulduzdir.

Mudofaa vazirligi Axborot va ommaviy kommunikatsiyalar departamenti