Gʻurur, xotira va ilhom maskani: “Gʻalaba bog‘i” va “Shon-sharaf” muzeyiga sayohat
2025-05-02 18:15:00 / Yangiliklar
Aynan ana shunday ezgu niyat asosida tashkil etilgan “Gʻalaba bog‘i” yodgorlik majmuasi va “Shon-sharaf” davlat muzeyiga uyushtirilgan ekskursiya yosh avlod uchun unutilmas taassurotlar manbai bo‘ldi.
Yangiyo‘l tumanida joylashgan Havo hujumidan mudofaa qo‘shinlari va Harbiy havo kuchlari qo‘mondonligiga qarashli harbiy qism xodimlari tashabbusi bilan 11-sonli ixtisoslashtirilgan maktab o‘quvchilari, Respublika Ma’naviyat va ma’rifat markazi Yangiyo‘l shahar bo‘limi hamda Mudofaa vazirligi huzuridagi Jamoatchilik kengashi Toshkent viloyati bo‘linmasi hamkorligida tashkil etilgan ushbu sayohat bolajonlarga nafaqat o‘tmishni anglash, balki kelajakka dadil qadam qo‘yish uchun ilhom bag‘ishladi.
Ekskursiya avvalida “Gʻalaba bog‘i” majmuasining tashqi qismini aylanib chiqqan bolajonlar, mayin va yuraklarga ta’sir etayotgan musiqa sadolari ostida tarixning og‘ir sahifalari bilan yuzma-yuz keldi. Okoplar, blindajlar, urush vaqtidagi dala oshxonalari, temir yo‘l vokzali va tibbiyot punktlari — bularning har biri o‘tmishda yashagan insonlarning mashaqqatli hayotini gavdalantirdi. Go‘yo har bir ekspozitsiya tilga kirib, bir sahifalik hayotiy hikoya aytayotgandek: biri front ortida kechgan kunlardan, boshqasi esa onalar va bolalar ko‘zidagi sog‘inch va sabr to‘la nigohlardan so‘zlardi.
“Shon-sharaf” muzeyida esa tarix butun bo‘yi bilan namoyon bo‘ldi. Hayotiy manekenlar, jangovar texnika modellarining har biri urush yillarining og‘ir nafasini olib kelgandek edi. Mehnatkash ayollar, fidoyi shifokorlar, vatan uchun jonini fido qilgan ofitserlar — bu obrazlar yoshlarning tasavvurida unutilmas iz qoldirdi. Har bir burchakda – bir saboq, har bir eksponatda – bir jasorat yashiringan edi.
Ekskursiya davomida bolalarning ko‘zlarida faxr, qalblarida esa tarix bilan bog‘langan yangi hislar uyg‘ondi. Ular uchun bu sayohat o‘tmishga safar emas, balki ma’naviy yuksalish, ichki uyg‘onish, Vatanga bo‘lgan mehr va sadoqatni yanada chuqurlashtirgan voqea bo‘ldi.
Mudofaa vazirligi Axborot va ommaviy kommunikatsiyalar departamenti