O‘zbekiston Respublikasi Mudofaa vazirligi

Urush yillarida Surxondaryo viloyatidan 53 ming 365 nafar mard, botir o‘g‘lon frontga yo‘l olgan. Ularning 11 mingdan ortig‘i jonini urush maydonlarida fido qilgan. 

Boysun tumanidagi “Temir darvoza” mahallasida istiqomat qilayotgan 104 yoshli urush faxriysi Shohimardon bobo Hamroyev — ana shunday tarix guvohi, xalqimiz faxridir. Uning yoshlik yillari insoniyat boshiga kulfat olib kelgan, minglab oilalarni baxtsiz, bolalarni yetim qilgan urush davriga to‘g‘ri keldi. Jang maydonida jasorat ko‘rsatgan bobo, urushdan keyin maktabda o‘quvchilarga saboq berib, yurt taraqqiyotiga hissa qo‘shgan.

Shohimardon bobo boshdan kechirgan ocharchilik yillari, hayot sinovlari, xalq farovonligi uchun qilgan fidokorona mehnati bugungi avlod uchun saboq bo‘lishi kerak. Bugun ham u kishi tinch va obod Yangi O‘zbekiston uchun duo qilib, yoshlarga sabr, matonat va fidoyilikni o‘rgatmoqda.

Xotira va qadrlash kuni arafasida Shohimardon bobo xonadoni mehmonlar bilan to‘ldi. Janubiy-G‘arbiy maxsus harbiy okrug harbiy xizmatchilari, Termiz harbiy prokuraturasi, tuman mudofaa bo‘limi xodimlari va yoshlar otaxon holidan xabar olishdi. Bu nafaqat mehr-e’tibor, balki avlodlar oralig‘idagi ruhiy bog‘liqlik, tarixga hurmat timsolidir.

Shunday fidoyi insonlar bor ekanki, tarix unutilmaydi. Shohimardon bobo singari qahramonlarimiz esa abadiy yashaydi — yuraklarimizda, xotiramizda va tinch hayotimizda.

Janubiy-G‘arbiy maxsus harbiy okrug axborot xizmati