O‘zbekiston Respublikasi Mudofaa vazirligi

Konferensiyaning asosiy maqsadi – o‘zbek xalqining Ikkinchi jahon urushidagi fidoyiligi, front ortidagi mashaqqatli mehnati, minglab yurtdoshlarimizning jasoratli xizmatlaridan saboq chiqarish, shu orqali harbiy xizmatchilar ongida milliy g‘urur, sadoqat va burch tuyg‘ularini shakllantirish bo‘ldi. 

Konferensiya doirasida yurtimizning yetakchi ilmiy va ijtimoiy institutlari vakillari, jumladan, O‘zbekiston Milliy universiteti, Ichki ishlar vazirligi Akademiyasi, Tarix davlat muzeyi vakillari, taniqli tarixchilar hamda harbiy olimlar ishtirok etdi. Ular tomonidan tarixiy hujjatlar, statistik ma’lumotlar va shaxsiy xotiralarga asoslangan ilmiy ma’ruzalar tinglandi. Ushbu chiqishlar ilmiy asoslanganligi va chuqur mazmunga ega ekanligi bilan ajralib turdi.

Anjumanda keltirilgan ma’lumotlarga ko‘ra, Ikkinchi jahon urushi yillarida 1,5 milliondan ortiq o‘zbekistonlik frontga safarbar etilgan. Minglab yurtdoshlarimiz orden va medallar bilan taqdirlangan. Bu raqamlar oddiy statistika emas, balki ularning ortida matonat, jasorat, fidoyilik va eng avvalo, Vatanga muhabbat mujassamdir.

Konferensiya yakunida bildirgan fikrlar, keltirilgan dalillar hamda taklif va mulohazalar harbiy vatanparvarlik tarbiyasida g‘oyaviy-axloqiy manba sifatida muhim ahamiyat kasb etdi. Faol ishtirokchilarga Qurolli Kuchlar Akademiyasining tashakkurnomalar va esdalik sovg‘alari topshirildi.

Qurolli Kuchlar Akademiyasi axborot xizmati