Umumarmiya oʻyinlari-2025 gʻolib va sovrindorlari aniqlandi
2025-04-26 17:50:00 / Yangiliklar
Ikki yuzdan ortiq harbiy sportchi bellashuvlarda koʻrsatgan natijalari bilan oʻz jamoalari hisobiga qimmatli ochkolarni toʻplab borishdi. Musobaqalarga Chirchiq oliy tank qoʻmondonlik-muhandislik bilim yurti, Mudofaa vazirligi Oliy sport natijalarini rivojlantirish markazi, Toshkent harbiy okrugi “Chirchiq” dala-oʻquv maydoni va Chirchiq garnizonida joylashgan harbiy qism mezbonlik qildi.
Janubi-gʻarbiy harbiy okrugi jamoasi sharafini himoya qilgan leytenant Shohrux Davlatov yarim marafon bahslarining gʻolibiga aylandi. Olimpiada va bir necha xalqaro musobaqalar sovrindori va ishtirokchisi sanalgan Shohrux 21 km, 97,5 metrlik masofada marraga raqiblarini ancha ortda qoldirgan holda yetib keldi. Shuningdek, bellashuvlarda ayrim kutilmagan natijalar ham qayd etildi. Makarov toʻpponchasidan oq otish bahslarida kapitan Sanjar Nosirov birinchi oʻrin uchun kurashda (Janubi-gʻarbiy harbiy okrugi) koʻpgina xalqaro musobaqalar gʻolibi Quvonchbay Berdixanov (Shimoli-gʻarbiy harbiy okrugi)ni, shuningdek Sharqiy harbiy okrugi jamoasi aʼzosi Farrux Gʻayratov kabi raqiblariga imkoniyat qoldirmadi.
Harbiy-amaliy va Olimpiya sport musobaqalarinig qolgan turlarida ham bellashuvlar murosasiz va qiziqarli kurashlarga boy boʻldi. Har bir jamoaning aʼzosi oʻzi ishtirok etayotgan vazn toifasi yoki yoʻnalishda professional sportchilarga xos harakatlarni amalga oshirgani eʼtiborga molik. Musobaqa yakunlariga koʻra Toshkent harbiy okrugi sportchilari eng koʻp sovrinli oʻrinlarni egallagan holda jamoalar oʻrtasida birinchi oʻrinni qoʻlga kiritdi. Ikkinchi oʻrin Toifalangan obyektlarni qoʻriqlash qoʻmondonligi jamoasiga nasib etgan boʻlsa, Maxsus operatsiya kuchlari qoʻmondonligi jamoasi sovrindorlar uchligi yakunlab berdi.
Qurolli Kuchlar akademiyasida musobaqa gʻolib va sovrindorlari munosib tarzda taqdirlandi. Bahslarda oʻz imkoniyatlarini har tomonlama namoyish etgan harbiy sportchilarga kubok, diplom va qimmatbaho sovg‘alar topshirildi.
Mudofaa vazirligi Axborot va ommaviy kommunikatsiyalar departamenti