“Vatanparvar” tashkilotining hududiy kengashiga yangi texnikalar topshirildi
2025-04-26 17:00:00 / Yangiliklar
O‘zbekiston Respublikasi mudofaasiga ko‘maklashuvchi “Vatanparvar” tashkilotining Qashqadaryo viloyati kengashi tasarrufidagi Koson, Mirishkor tumanlari o‘quv sport texnika klublari va Shahrisabz avtomobil maktabiga “FOTON” rusumli yuk mashinalari, shuningdek, viloyat texnik va amaliy sport turlarini rivojlantirish markazi hamda Koson, Shahrisabz va Qarshi tumanlari o‘quv sport texnika klublariga “Onix”, “Damas” va “Cobalt” rusumidagi yengil avtomobillar tantanali ravishda topshirildi.
Marosimda so’z olganlar barchani yangi texnikalar bilan tabriklab, bugungi kunda yo‘llarda sodir bo‘layotgan yo‘l transport hodisalarini oldini olish uchun ham o‘qitish tizimini yanada takomillashtirish lozimligini alohida ta’kidlab o‘tishdi.
Shuningdek, mehmonlar tashkilot xodimlariga avtomototransport vositalari haydovchilarini tayyorlash bo‘yicha ta’lim sifatini oshirish yuzasidan o‘z maslahat va takliflarini bildirdi.
Endilikda ushbu yangi zamonaviy avtomobillardan “Vatanparvar” tashkiloti viloyat kengashi tasarrufidagi o‘quv muassasalarida “BC” toifalari bo‘yicha tahsil olayotgan fuqarolar amaliy mashg‘ulotlarda foydalanadilar.
O‘zbekiston Respublikasi mudofaasiga ko‘maklashuvchi
“Vatanparvar” tashkiloti matbuot xizmati