O‘zbekiston Respublikasi Mudofaa vazirligi

Bugungi globallashuv jarayonida internet olamida amalga oshirilayotgan kiberjinoyatlar, firibgarlik, zararli dasturlar orqali maʼlumotlarni noqonuniy yoʻl bilan qoʻlga kiritish, avtomatlashtirilgan boshqaruv tizimlarini zararlash va ishdan chiqarish kabi jinoyatlar avj olmoqda. Bularga qarshi kurashish, odamlarning bilim va oʻquvini oshirish, kiberjinoyatchilarning xatti-harakatlarini aniqlash va xavfsizlik tizimlarini taʼminlash uchun, albatta, IT sohasida yetuk mutaxassislarni tayyorlash dolzarb vazifa boʻlib qolmoqda. Zero, kiberjinoyatchilik XXI asrning eng dolzarb muammosi, eng katta xavf manbaiga aylanib ulgurgan.

Taʼkidlash joizki, Ustudy — Uzinfocom kompaniyasi tomonidan amalga oshirilayotgan loyiha boʻlib, global muammolarga tayyor IT-mutaxassislarni tayyorlashga qaratilgan. Ustudy missiyasi bilim va amaliy tajribadan foydalangan holda jamiyatda hayot sifatini yaxshilashga yordam beradigan innovatsion yechimlarni yaratishdan iborat. Ustudy boʻlajak soha yetakchilari shakllanadigan haqiqiy IT markazi sifatida qaraladi. U amaliy mashgʻulotlar, individual taʼlim dasturlari va murabbiylik kabi noyob xizmatlarni oʻrganuvchilarga taklif etishi bilan ahamiyatlidir.

Shimoli-gʻarbiy harbiy okrug qoʻshinlari qoʻmondonligi hamda “IT taʼlim berish markazi Ustudy” MCHJ, “Yagona integrator UZINFOCOM” MCHJning Qoraqalpogʻiston Respublikasi boʻyicha boʻlinmasi rahbariyati hamda harbiy okrug boshqaruv apparati masʼullari ishtirok etgan tadbirda bugungi kunda axborot-kommunikatsiya texnologiyalari hayotimizning barcha sohalarida, jumladan, harbiy-amaliy faoliyatda ham muhim oʻrin tutayotgani alohida taʼkidlab oʻtildi.
Bu borada “Qoraqalpogʻiston tajribasi” sifatida yangi tizimning joriy etilishi, endilikda safarbarlik chaqiruvi rezervida xizmatni oʻtash uchun kelgan chaqiriluvchilarni alohida dastur asosida tayyorlash boʻyicha kelishuvga erishilgani zamon talabi bilan hamoxang boʻlgani eʼtirof etildi.

Shundan soʻng tomonlar bu yoʻnalishda oʻzaro hamkorlik oʻrnatish borasida memorandumga qoʻl qoʻyishdi. Mehmonlar 2024-yilda kapital taʼmirdan chiqqan safarbarlik chaqiruvi rezervi batalyonining infratuzilmasi, taʼlim va tarbiya olish jarayoni, mashgʻulot xonalari hamda kutubxona bilan tanishtirildi.

Shimoli-gʻarbiy harbiy okrug matbuot xizmati boshligʻi