Qashqadaryoda yoshlar amaliy o‘q otish mashg‘ulotida qatnashdi
2025-04-25 19:30:00 / Yangiliklar
Dastlab yoshlar turli o‘quv nuqtalarida milliy armiyamizda mavjud jangovar qurollar va texnikalar haqida, ulardan foydalanish tartibi borasida atroflicha ma’lumotlarga ega bo‘lishdi. Qurollarni noto‘liq qismlarga yoyish va yig‘ish, birinchi tibbiy yordam ko‘rsatish kabi mashqlarda ishtirok etib, bilim va ko‘nikmalarini yanada mustahkamlab oldilar.
Shundan so‘ng o‘quvchi yoshlar amaliy mashg‘ulotni o‘tash uchun yakuniy tayyorgarlikni boshlashdi. Himoya kiyimlari kiyildi, maxsus qurol-yarog‘lar bilan ta’minlanib, 100 metr masofada bo‘y barobar shakldagi nishonlarni mo‘ljalga olish uchun o‘q otish nuqtalariga joylashdi.
O‘ziga ishonch bilan nishonlarni aniq yakson qilayotgan o‘g‘lonlar Amir Temur, Jaloliddin Manguberdi singari bobokalonlarimizga munosib voris ekanliklarini yana bir bor amalda isbotladilar. Mashqlarda “Bir nishon — bir o‘q” tamoyiliga amal qilindi.
Ma’lumot o‘rnida, o‘quvchilarning amaliy o‘q otish mashg‘ulotlari Janubi g‘arbiy maxsus harbiy okrugning “Nuriston” dala-o‘quv maydonida ham aniq reja asosida tizimli ravishda olib borilmoqda.
Janubi-g‘arbiy maxsus harbiy okrug matbuot xizmati