O‘zbekiston Respublikasi Mudofaa vazirligi

“Xalq va armiya – bir tanu bir jondir!” shiori ostida “Jadidlar izidan ilm istab” mavzusida tashkil etilgan ushbu tadbirda yurt tinchligi, erkinligi va mustaqilligi yo‘lida mardonavor xizmat qilib, o‘z jonlarini fido etgan ma’rifatparvar, elparvar, jadid ajdodlarimizning boy merosi yodga olindi.

Tadbir Havo hujumidan mudofaa qo‘shinlari va Harbiy havo kuchlari qo‘mondonligi harbiy qismi ishchi guruhi, “Shahidlar xotirasi” jamoat fondi, Mudofaa vazirligi jamoatchilik kengashi va bir qator jamoat tashkilotlari hamkorligida tashkil etildi.

Tadbir ishtirokchilari orasida harbiy xizmatchilar, o‘quvchi-yoshlar, o‘qituvchilar hamda jamoatchilik vakillari bo‘lib, ular savol-javoblar asosida faol muloqotda bo‘ldilar. Tadbir davomida jadid bobolarimizning millat ravnaqi, taraqqiyoti va erkinligi yo‘lida qilgan fidokorona xizmatlari, ularning ma’naviy merosi, ilm-ma’rifatga bo‘lgan cheksiz muhabbati va jasorati haqida so‘z yuritildi. Shu bilan birga, “Jadid” gazetasi faoliyati ham tilga olinib, u jadidlar orzu qilgan yangi zamonning ramzi sifatida baholandi.

Shuningdek, tadbir ishtirokchilari muzeydagi eksponatlar bilan yaqindan tashdi. Ekskursiya davomida askarlar millatimiz jadidlari va qatag‘onga uchragan taniqli davlat arboblari, fan va madaniyat namoyondalari, maorif, yozuvchi va shoirlarning  adabiy merosi bilan yaqindan tanishdi. Ekskursiya askarlarga tarixning bir sahifasini ochdi, desak mubolag‘a bo‘lmaydi. Tadbir mazmunli va ma’lumotlarga boy o‘tgani bilan ahamiyatli bo‘ldi.

Tadbirda ishtirok etgan Chirchiq shahar 2-umumiy o‘rta ta’lim maktabining yuqori sinf o‘quvchilaridan tashkil topgan “Turon” teatrining “Yangi avlod” jamoasi hamda Toshkent shahar Yashnobod tumani 153-umumiy o‘rta ta’lim maktabi qoshidagi “Olimp-lider” sport klubi a’zolari tomonidan sahna ko‘rinishlari namoyish etildi. O‘quvchi yoshlar ishtirokchilarga unutilmas lahzalarni taqdim etdilar.

Mudofaa vazirligi Axborot va ommaviy kommunikatsiyalar departamenti