O‘zbekiston Respublikasi Mudofaa vazirligi

Ta’kidlash joizki, ushbu musobaqa Mudofaa vazirligi miqyosida har ikki yilda bir marotaba, harbiy okrug va muassasalarda esa har yili o‘tkaziladi. Musobaqa harbiy xizmatchilarning jismoniy tayyorgarligini mustahkamlash, jangovar shaylikni oshirish va harbiy sportchilar safini kengaytirish bilan birga, harbiy xizmatchilarning erishayotgan yutuqlarini ommaga keng targ‘ib qilishda muhim o‘ringa ega.

Hozircha musobaqaning  “Armiya biatloni” bahslari yakunlanib, Toshkent harbiy okrugi jamoasi umumiy hisobda g‘oliblikni qo‘lga kiritdi. Musobaqa davomida ishtirokchilar maxsus belgilangan masofani yugurib o‘tish, nishonga aniq o‘q uzish, shuningdek, turli to‘siqlardan muvaffaqiyatli o‘tish kabi topshiriqlarni bajarishdi.

Musobaqa doirasidagi qo‘l jangi, pichoq uloqtirish, tosh ko‘tarish, badminton, yengil atletika, milliy kurash, o‘q otish hamda ofitserlar uch kurashi kabi bellashuvlarda jamoalar ishonchli natijalarni qayd etib, g‘oliblikni qo‘lga kiritish uchun tinimsiz mehnat qilishmoqda. Har bir ishtirokchining harakati esa tajribali hakamlar hay’ati tomonidan sinchkovlik bilan baholab borilyapti.

Yana bir necha kun davom etadigan musobaqa bellashuvlari harbiy xizmatchilarni har tomonlama toblab, jismonan chiniqtirishga, birdamlik va hamjihatlikda ish ko‘rish ko‘nikmalarining mustahkamlanishiga ishonamiz.

Mudofaa vazirligi Axborot va ommaviy kommunikatsiyalar departamenti