O‘zbekiston Respublikasi Mudofaa vazirligi

Ma’naviy-ma’rifiy ruhda o‘tgan tantanali marosimda bilim yurtining faxriy ustozlari, 2000-yil bitiruvchilari, yosh ofiserlar, kursantlar, harbiy akademik lisey tarbiyalanuvchilari, ota-onalar ishtirok etdi. 

Dastlab, ishtirokchilar Amir Temur haykali poyiga gul qo‘yishdi. 

Shundan so‘ng ishtirokchilari yaqinda qayta ta’mirdan chiqqan Markaziy harbiy okrug muzeyida bo‘lib, sobiq batalion komandiri podpolkovnik Ochil Xojiyevga bag‘ishlangan «Xotira burchagi»ni ochib berishdi.
Shuningdek, mehmonlar markaz infratuzilmasi bilan tanishib, zamonaviy sharoitlarda olib borilayotgan harbiy tayyorgarlik jarayonlariga guvoh bo‘lishdi.

Tadbirda O‘zbekiston Respublikasi Mudofaa vazirligi markaziy apparati va faxriylar kengashi vakillari,  Qurolli Kuchlar Kichik mutaxassislarni tayyorlash markazi hamda Markaziy harbiy okrug rahbariyati bitiruvchilarga samimiy tabriklar yo‘llashdi. 

– Bu yil 1996-2000 yillarda tahsil olgan kursantlar bitiruviga 25 yil to‘ldi. O‘sha davrda Markaziy Osiyodagi murakkab harbiy-siyosiy vaziyat sababli bu kursantlar salkam 4 oy davomida qo‘shinlarda amaliyotga jalb etilgan edi. O‘zbekiston tarixida ilk bor ular muddatidan 3 oy oldin bitirib, sarhadlarimizni himoya qilishga kirishdilar. Bugun ular orasidan 30 dan ortiq ofiserlar Qurolli Kuchlar tarkibidagi kuch ishlatar tuzilmalarida va boshqa davlat idoralarida turli lavozimlarda xizmat qilmoqda. Bu biz uchun faxr, yosh avlod uchun – ibrat va namunadir, – deydi zaxiradagi polkovnik Baxri To‘xtayev.

Tadbirda bilim yurtining 2000 yilgi bitiruvchilariga esdalik nishonlari va sovg‘alar topshirildi. Nuroniy ustozlar va harbiy faxriylar o‘z hayot yo‘llari, xizmatdagi shonli davrlar va hozirgi yoshlarga berayotgan saboqlari bilan o‘rtoqlashdi.
“Uch avlod uchrashuvi” doirasida vafot etgan xizmatdoshlar yodga olinib, ular haqidagi qisqa videolavha namoyish etildi. Harbiy orkestr chiqishlari va konsert dasturi uchrashuv davomida  ishtirokchilarga ko‘tarinki kayfiyat ulashdi.

Ishonchimiz komilki, bu kabi uchrashuvlar, shubhasiz yosh avlod qalbida Vatanga sadoqat, jasorat va ustozlarga hurmat tuyg‘ularini yanada mustahkamlaydi.