O‘zbekiston Respublikasi Mudofaa vazirligi

Shonli tarixga ega bo‘lgan ushbu bilim yurtida ko‘p yillar xizmat qilgan zaxiradagi harbiy xizmatchilar hamda mazkur bilim yurtining tamal toshi qo‘yilishida jonbozlik ko‘rsatgan Qurolli Kuchlar ishchi xizmatchilarining Qarshi shahriga, xususan, institutga tashrifi amalga oshirildi.

Faxriy mehmonlar institut boshlig‘i hamrohligida zamonaviy qiyofadagi laboratoriyalar, uchish trenajyorlari, kursantlar uchun yaratilgan shart-sharoitlar bilan yaqindan tanishdi. Shu bilan birga, tadbir ishtirokchilari yotoqxona, oshxona va kutubxona, shuningdek, institutning shonli tarixi aks etgan muzeyda ham bo‘lishdi.

Shundan so‘ng institutning madaniyat markazida kursantlar va faxriy ustozlar o‘rtasida samimiy davra suhbati tashkil qilindi. Qalblarga g‘urur baxsh etuvchi kuy-navolar, harbiy urf-odat va an’analarni o‘zida mujassam etgan marsh qo‘shiqlari ishtirokchilarning ko‘ngliga iliqlik baxsh etgan bo‘lsa, yangicha qiyofada faoliyat boshlagan institut hayoti haqida suratga olingan “Yangi O‘zbekiston lochinlari” filmining namoiyishi mehmonlar va yig‘ilganlarga birdek manzur keldi.

Tadbir yakunida institut hududida barpo etilgan “Mangu jasorat” monumenti faxriylar tomonidan e’tirof etilib, soha fidoyilariga hurmat bajo keltirildi.