O‘zbekiston Respublikasi Mudofaa vazirligi

Mazkur yig‘in doirasida desant tayyorgarligi yo‘nalishida xizmat olib borayotgan ofitser va yo‘riqchilar bilan nazariy va amaliy mashg‘ulotlar o‘tkazildi. Unda ishtirokchilarning jismoniy holati, parashyut bilan sakrash ko‘nikmalari, favqulodda holatlarda harakat qilish tartibi, shuningdek, zamonaviy jangovar harakatlarda qo‘llaniladigan uslublar keng muhokama qilindi.

Mashg‘ulotlarda asosiy e’tibor desant bo‘linmalarining jangovar salohiyatini yanada yuksaltirish, zamonaviy o‘quv metodikalarini joriy etish hamda mutaxassislar o‘rtasida tajriba almashuvini ta’minlashga qaratildi.

Ta’kidlash joizki, havo-desant bo‘linmalari Qurolli Kuchlar tarkibidagi eng harakatchan, yuqori jangovar shaylikka ega bo‘lgan va ko‘p funksiyali birliklardan hisoblanadi. Ular qisqa vaqt ichida havo orqali zarur hududga yetib borish, istalgan joyga parashyut orqali desant tushirish hamda murakkab harbiy operatsiyalarni muvaffaqiyatli bajarishga qodir. Desantchilar turli iqlim va yer sharoitlarida, xususan, suvli, qorli va tog‘li hududlarda ham samarali faoliyat yurita oladi.

Yig‘in davomida ishtirokchilarga desant tayyorgarligi jarayonida yo‘l qo‘yilishi mumkin bo‘lgan xatoliklarning oldini olish, xavfsizlik texnikasi qoidalariga qat’iy rioya etish bo‘yicha maxsus ma’ruzalar o‘qib eshittirildi hamda tajriba almashildi.

Shuningdek, yig‘in davomida harbiy xizmatchilarning parashyut tizimlari, yuklarni desantlashtirishga tayyorlash va ularni turli usullar bilan desantlashtirish bo‘yicha nazariy va amaliy bilimlari sinovdan o‘tkazildi.

Natijalarga ko‘ra, havo-desant tayyorgarligi mutaxassislariga mustaqil ishlash uchun ruxsatnomalar, shuningdek, munosib deb topilganlarga “Havo-desant tayyorgarligi yo‘riqchisi” maxsus unvoni berilishi belgilandi.

Mazkur o‘quv-uslubiy yig‘inlar harbiy xizmatchilarning jangovar tayyorgarlik darajasini oshirish, ularning kasbiy mahoratini mustahkamlash va harbiy intizomni kuchaytirishda muhim ahamiyat kasb etadi.

Sharqiy harbiy okrug matbuot xizmati