O‘zbekiston Respublikasi Mudofaa vazirligi

Ushbu markaz faoliyati avvalo, Prezidentimizning 2024-yil 4-noyabrdagi Oʻzbekistonda oʻq otish sportini yanada rivojlantirish va ommalashtirish boʻyicha qarorlari ijrosini taʼminlashga qaratilgan amaliy qadamlardan biridir. Shu bilan birga, mazkur zamonaviy sport inshooti 2028-yilda Los-Anjelesda boʻlib oʻtadigan Olimpiya oʻyinlariga yosh sportchilarni tayyorlash, ularning xalqaro musobaqalarda munosib qatnashishini taʼminlash maqsadida Sport vazirligi bilan hamkorlikda tashkil etildi.

Ochilish marosimida Oʻzbekiston Respublikasi Mudofaa vaziri Shuxrat Xalmuxamedov, Sport vaziri Adham Ikramov hamda Milliy Olimpiya qoʻmitasi raisining birinchi oʻrinbosari Otabek Umarov ishtirok etib, mazkur inshootning yosh isteʼdodlarni yuzaga chiqarishdagi ahamiyati, Prezidentimiz boshchiligida soʻnggi yillarda sportchilarga yaratilayotgan sharoitlar, ular uchun barpo etilgan 101 ta yirik va 67 ta rekonstruksiya qilingan sport inshootlari haqida alohida toʻxtalib oʻtishdi.

Tadbir doirasida mehmonlar sportchilar uchun yaratilgan infratuzilma va sharoitlar, oʻquv-mashq nuqtalari bilan tanishib, yosh sportchilar bilan samimiy muloqotga kirishdilar.
Eʼtiborlisi, qayta rekonstruksiya qilingan ushbu baza zamonaviy arxitektura va texnik talablarga javob beradigan holda yangidan jihozlandi. Bir vaqtning oʻzida bu yerda 50 nafar sportchi 10, 25 va 50 metrlik oʻq otish TIRlarida amaliy mashgʻulotlar olib borish bilan birga xalqaro musobaqa va yigʻinlar oʻtkazish imkoniyatiga ega boʻldilar. 

Bundan tashqari markaz hududida sportchilar muzeyi tashkil etilgan boʻlib, u yerda oʻq otish sportining yaratilish tarixi, xalqaro musobaqalarda sportchilar tomonidan erishilgan gʻalabalar aks ettirilgan. 

Yangi koʻrinishda faoliyat boshlagan “Sport markazi oʻq otish bazasi” nafaqat sportchilar uchun mukammal tayyorgarlik maskani, balki oʻq otish sportining keng ommalashuviga xizmat qiladigan ilgʻor maydon boʻlib xizmat qiladi.

Mudofaa vazirligi Axborot va ommaviy kommunikatsiyalar departamenti