O‘zbekiston Respublikasi Mudofaa vazirligi

Dastlab mehmonlarni faxriy qorovul ishtirokida rasmiy kutib olish tadbiri bo‘lib o‘tdi. Harbiy orkestr tomonidan ikki davlat madhiyasi ijro etildi.

Mudofaa vazirligi markaziy apparatida o‘tkazilgan ikki tomonlama hamkorlik uchrashuvida general-mayor Shuxrat Xalmuxamedov delegatsiya a’zolarini O‘zbekistonga uyushtirgan tashrifi bilan qutlab, Oʻzbekiston va Vengriya oʻrtasida ko‘plab sohalarda olib borilayotgan hamkorlik ishlari aloqalarni yanada mustahkamlashga xizmat qilayotganini taʼkidladi.

Uchrashuvda delegatsiya rahbari bilan qardosh xalqlarning birdamligi, O‘zbekiston-Vengriya hamkorligining mudofaa sohasidagi bugungi holati va uni rivojlantirish istiqbollari, shuningdek, mintaqaviy xavfsizlikni ta’minlash masalalari muhokama qilindi.

Rasmiy qabuldan so‘ng Vengriya mudofaa vaziri Kristof Salay-Bobrovniskiy boshchiligidagi harbiy delegatsiya “G‘alaba bog‘i” yodgorlik majmuasiga tashrif buyurib, faxriy qorovul ishtirokida “Matonat madhiyasi” monumenti poyiga gul qo‘ydi. Shuningdek, rasmiy mehmonlar “Shon-sharaf” davlat muzeyi eksponatlari va “G‘alaba bog‘i” yodgorlik majmuasining boshqa ko‘plab monumentlari bilan yaqindan tanishdi.

Kun davomida Vengriya harbiy delegatsiya ishtirokida “Botkino” shahar qabristonida Birinchi jahon urushida halok bo‘lgan venger askarlari yodgorligiga gul qo‘yish marosimi o‘tkaziladi. Shundan so‘ng rasmiy mehmonlar O‘zbekistion Respublikasi Qurolli Kuchlari akademiyasining infratuzilmasi va moddiy o‘quv bazasi bilan tanishadi. Shuningdek, delegatsiyaning Innovatsion texnologiyalar markazi va “Chimyon” o‘quv mashg‘ulotlar markaziga tashrifi ham rejalashtirilgan.

Vengriya mudofaa vaziri Kristof Salay-Bobrovniskiy boshchiligidagi harbiy delegatsiya rasmiy tashrifini Samarqand shahrining diqqatga sazovor joylariga sayohat bilan yakunlashi ko‘zda tutilgan.

Mudofaa vazirligi Axborot va ommaviy kommunikatsiyalar departamenti