O‘zbekiston Respublikasi Mudofaa vazirligi

Kelayotgan yoz mavsumida texnika va qurol-aslahalarni jangovar shay holatda saqlanishini taʼminlash ishlari boshlanishidan oldin harbiy okrug harbiy qism va muassasalarning komandirlari hamda texnikalarga javobgar shaxslari ishtirokida koʻrgazmali mashgʻulotlar tashkil etilmoqda.

Mazkur kompleks tadbirlar harbiy texnika va qurol-aslahalarni yuqori jangovar shaylik darajasida ushlab turish hamda ob-havoning issiq, namlik past boʻlgan choʻl sharoitida foydalanishga hozirlash uchun oʻtkaziladi. Bunday tadbirlar tehnika va qurol-aslahalarning yaroqlilik muddatini oshirib, ularning soz holatda boʻlishini taʼminlaydi.

Nukus garnizonidagi harbiy qismlarning birida qurol-yarogʻ va harbiy texnikalarni mavsumiy foydalanish rejimiga oʻtkazish boʻyicha tashkil etilgan koʻrgazmali mashgʻulotda soʻzga chiqqanlar harbiy texnika va qurol-aslahalarning jangovar shayligini taʼminlash, ularni soz holatda saqlashda koʻrsatilayotgan texnik xizmatlarning ahamiyatini taʼkidlab oʻtishdi. Har bir komandir, har bir harbiy xizmatchi oʻziga biriktirilgan qurol-yarogʻ va harbiy texnikaning soz va shayligi uchun masʼul ekanligi eslatildi.

Koʻrgazmali mashgʻulotni tashkil etish uchun harbiy qismning jangovar va harbiy texnikalarni saqlash parkida 10 ta oʻquv joyi va 20 ta oʻquv nuqtalari ajratildi. U yerda jangovar mashina, tank, zirhli transportyor, zenit-artilleriya qurilmalari, maxsus texnika, qurol-yarogʻ va boshqa texnikalarni yozgi sharoitda foydalanish rejimiga oʻtkazish ishlarining mohiyati, texnika xavfsizligi qoidalariga rioya etish, tashkil etilgan postlarda samarali va sifatli ish olib borish, qurol-yarogʻ va texnikani ob-havoning harorati yuqori sharoitlarda ishlatish qoidalari, jarohatlanganlarga birinchi tibbiy yordam koʻrsatish boʻyicha mutaxassislar tomonidan yoʻriqnomalar berildi. Texnikalarga texnik xizmat koʻrsatish boʻyicha koʻrgazmali tarzda ishlar namoyish etildi.

Mazkur tadbirlarni bajarishda texnologik xaritalarga koʻra harbiy qismlardagi texnikalarda sovutish suyuqliklari almashtiriladi, har bir jangovar mashina agregat va tugunlari tekshiriladi, filtrlarni tozalash va almashtirish ishlari oʻtkaziladi, yoqilgʻi-moylash ashyolari yangisiga oʻzgartiriladi, elektr va aloqa jihozlarining sozligi nazoratdan oʻtadi.

Tadbir rejasiga koʻra aprel oyida Shimoli-gʻarbiy harbiy okrug qoʻshinlaridagi mavjud qurol-aslaha va harbiy texnikalarning barchasi yozgi mavsumda foydalanish uchun shay holatga keltiriladi.

Shimoli-gʻarbiy harbiy okrug matbuot xizmati