Urush qantashchisi 100 yoshni qarshiladi
2025-03-26 10:30:00 / Yangiliklar
Shu munosabat bilan Havo hujumidan mudofaa qo‘shinlari va Harbiy havo kuchlari qo‘mondonligi tomonidan 100 yoshni qarshilagan iste’fodagi podpolkovnik Pavel Materikovning holidan xabar olindi. Bundan asosiy maqsad uning sihat-salomatligi, yashash sharoitlari bilan tanishish hamda moddiy va ma’naviy qo‘llab-quvvatlashdan iborat.
Pavel Aleksandrovich Materikov 1925-yil 24-martda Vologda viloyatining Mejdurechenskiy tumanida tug‘ilgan. 1943-yilda armiyaga chaqirilgan. Urush tugaganidan keyin radiotexnika maktabini tugatgan, Turkiston harbiy okrugining havo mudofaasi kuchlarida 31 yil xizmat qilgan. Suhbat davomida urush va tinchlik yillarining qadri haqida so‘z yuritildi.
Podpolkovnik Pavel Materikovning xizmatlari e’tirof etilib, unga sovg‘alar ulashildi, tavallud ayyomi bilan muborakbod etishdi. Harbiylar va yoshlar faxriy bilan suhbatlashib, uning jangovar xotiralari, urush davrining og‘ir sinovlari, mardlik saboqlari haqida bilib olishdi.
Xotira va qadrlash kuni nafaqat g‘alaba qozongan avlodni sharaflash, balki kelajak avlodga ibrat bo‘lish uchun ham g‘oyat muhim. Bunday tadbirlar faxriylarning umr yo‘llarini hurmat qilish, ularning beqiyos xizmatlariga minnatdorlik bildirish imkonini beradi. Bugungi tinch va osoyishta hayotimiz ana shunday fidokor insonlarning jasoratlari evaziga ta’minlangan.
Bu kabi yo‘qlov tashriflari Mudofaa vazirligi tomonidan yil davomida amalga oshiriladi. Zero, faxriylarimizning ko‘nglini ko‘tarish, ularni har tomonlama qo‘llab-quvvatlash har birimizning insoniy burchimizdir.
Ro‘ziqul Ochilov, Mudofaa vazirligi Axborot va ommaviy kommunikatsiyalar departamenti