Yurtga muhabbat va fidoyilik
2025-02-27 14:00:00 / Yangiliklar
Xususan, Samarqand, Jizzax va Navoiy viloyatida otaliqqa olingan yoshlar uchun garnizonlardagi harbiy qismlarda “Harbiy qismda bir kunim” loyihasi doirasida “Ochiq eshiklar kuni” bo‘lib o‘tdi.
“Milliy armiyamiz — yoshlar nigohida!” shiori ostida o‘tkazilgan tadbirda dastlab milliy armiyamiz saflarida xizmat qilayotgan harbiy xizmatchilarga yaratilgan shart-sharoitlar va qo‘lga kiritilayotgan yutuqlar haqida ma’lumot berish maqsadida davra suhbatlari tashkil etildi.
Uchrashuvlarda milliy armiyamiz kuch-qudrati, unda yaratilayotgan keng imkoniyatlar, Qurolli Kuchlarimiz saflarida xizmat qilish va oliy harbiy ta’lim muassasalarida tahsil olish to‘g‘risida ma’lumotlar berilib, mavzuga doir qo‘llanma materiallar tarqatildi. Savol-javoblarga boy tarzda kechgan suhbatlardan so‘ng yoshlar harbiy qismdagi tarix muzeyida bo‘lib, buyuk bobolarimizning harbiy yurishlari, yurt tinchligi uchun qo‘shgan hissasi hamda tariximizning boy merosi bilan yaqindan tanishdi.
Ayniqsa, Navoiy garnizonidagi harbiy qism targ‘ibot guruhi tomonidan Konimex tumanining olis hududida joylaygan 13 va 14-umumta’lim maktablarida “Vatan — ulug‘, burch — muqaddas!” konseptual g‘oyasi asosida o‘tkazilgan vatanparvarlik festivali yanada qizg‘in tus oldi.
Tadbir davomida harbiy orkestrning ona Vatanni madh etuvchi kuy-qo‘shiqlari, faxriy qorovulning saf chiqishlari ertamiz egalarining harbiylik kasbiga bo‘lgan qiziqishlarini yanada oshishiga xizmat qilgan bo‘lsa, adabiy kechalar, milliy she’riyat tanlovlari, sport musobaqalari ularning intellektual va ma’naviy yuksalishiga xizmat qildi.
Markaziy harbiy okrug matbuot xizmati